بجلی کی طلب کو پورا کرنے کیلئے فعال اقدامات کرنے چاہیے:ایل جی

جموں//
وادی میں سنگین ہورہے بجلی بحران کے بیچ لیفٹیننٹ گورنر‘ منوج سنہا نے ایک سو فیصد سمارٹ میٹر والے علاقوں میں معیاری اور بلا خلل بجلی فراہم کرنے کی ہدایت دی ہے ۔
لیفٹیننٹ گورنر‘آج جموں کشمیر میں بجلی کی فراہمی کی مجموعی صورتحال پر ایک جائزہ میٹنگ کی صدارت کی۔
ایک سرکاری بیان کے مطابق کشمیر اور جموں دونوں صوبوں میں بجلی کی بڑھتی مانگ کو پورا کرنے کے لیے مختلف پہلوؤں پر تفصیلی بات چیت ہوئی۔
میٹنگ کے دوران، لیفٹیننٹ گورنر نے پرنسپل سکریٹری، پاور ڈیولپمنٹ ڈیپارٹمنٹ، ایچ راجیش پرساد سے کہا کہ وہ کٹوتی کے منصوبوں کی سختی سے تعمیل کریں۔’’ایک سو فیصد سمارٹ میٹرڈ فیڈرز میں بلاتعطل اور معیاری بجلی فراہم کی جائے اور لوگوں کو کسی بھی قسم کی تکلیف سے بچنے کے لیے خراب ٹرانسفارمرز کو بروقت تبدیل کیا جائے‘‘۔
سنہانے کہا کہ زمین پر موجود ٹیم کو صورتحال پر گہری نظر رکھنی چاہیے اور بجلی کی طلب کو پورا کرنے کے لیے فعال اقدامات کرنا چاہیے۔
لیفٹیننٹ گورنر نے سمارٹ میٹروں کی تنصیب، افرادی قوت اور پاور انفراسٹرکچر کی صورتحال کا بھی جائزہ لیا۔
میٹنگ میں چیف سکریٹری ڈاکٹر ارون کمار مہتا‘ راجیش پرساد، پرنسپل سکریٹری، پاور ڈیولپمنٹ ڈیپارٹمنٹ؛ ایس سنتوش ڈی ویدیا، محکمہ خزانہ کے پرنسپل سکریٹری؛ ڈاکٹر مندیپ کمار بھنڈاری، لیفٹیننٹ گورنر کے پرنسپل سکریٹری اور دیگر سینئر افسران نے شرکت کی۔