سرینگر/یکم ستمبر
ایڈیشنل ڈائریکٹر جنرل آف پولیس (اے ڈی جی پی) کشمیر وجے کمار نے 62 روزہ شری امرناتھ جی یاترا کے پر امن اختتام پر تمام متعلقین خا ص طور پر اہلیان وادی کا شکریہ ادا کیا ہے ۔
بتادیں کہ چھڑی مبارک کے محافظ مہنت دیپندرا گری کی قیادت میں انجام دی گئی آخری پوجن کے ساتھ ہی اب تک کی طویل ترین شری امر ناتھ جی یاترا 31 اگست جمعرات کو بحسن و خوبی اور پر امن طریقے سے اختتام پذیر ہوئی۔
اس سالانہ یاترا کے پر امن طریقے سے اختتام ہونے پر اے ڈی جی پی کشمیر وجے کمار نے ٹویٹ کرکے کہا”میں 62 روزہ شری امرناتھ جی یاترا کے اختتام ہونے پر تمام متعلقین بالخصوص وادی کے لوگوں کا شکریہ ادا کرتا ہوں جنہوں نے سال 2023 کی اس یاترا کے پر امن اور بغیر کسی خلل کے انعقاد کو یقینی بنایا“۔
قابل ذکر ہے یکم جولائی سے شروع ہونی والی اس طویل یاترا کے دوران 22 اگست تک پونے پانچ لاکھ یاتریوں نے پوتر گھپا کا درشن کیا جبکہ سال گذشتہ کل صرف 3 لاکھ 60 ہزار یاتریوں ہی پوتر گھپا کے درشن سے شرفیاب ہوئے تھے ۔
یاتریوں کے تحفظ کو یقینی جموں سے پوتر گھپا تک ہزاروں کی تعداد میں سیکورٹی فورسز اہلکاروں کی تعیناتی عمل میں لائی گئی تھی اور یاتریوں کی دیگرسہولیات کےلئے بھی تمام تر ضروری اقدام کئے گئے تھے ۔
بانڈی پورہ:زخمی نوجوان کی۶روز بعد موت
سرینگر/یکم ستمبر
شمالی کشمیر کے ضلع بانڈی پورہ کے صدر کوٹ علاقے کا سڑک حادثے میں زخمی ہونے والا نوجوان۶دنوں تک موت و حیات کی کشمکش میں مبتلا رہنے کے بعد جمعہ کی صبح یہاں ایک ہسپتال میں دم توڑ گیا۔
ذرائع نے بتایا کہ بانڈی پورہ کے اجس سدنارا علاقے میں 26 اگست کو موٹر سائیکل سوار دو نوجوان ایک سڑک حادثے میں زخمی ہوگئے ۔
انہوں نے کہا کہ ان میں سے مبشر احمد راتھر ولد غلام رسول راتھر شیر کشمیر انسٹی ٹیوٹ آف میڈیکل سائنسز صورہ میں جمعہ کی صبح دم توڑ گیا۔
ان کا کہنا تھا کہ گرچہ ڈاکٹروں نے مذکورہ نوجوان کی جان بچانے کی تمام تر کوششیں کیں لیکن وہ جانبر نہ ہوسکا۔
دریں اثنا نوجوان کی موت واقع ہونے کی خبر پھیلتے ہی صدر کوٹ گاﺅں میں ماتم کا ماحول چھا گیا اور لوگوں بالخصوص متوفی کے احباب و اقارب کو زار و قطار روتے ہو
ئے دیکھا گیا۔