اسلام آباد میں میں سی آر پی ایف اہلکار سے رائفل چھینے کیلئے مرچی پاؤڈر کا استعمال

سرینگر//
جنوبی کشمیر کے ضلع اسلام آباد کے ریشی بازار علاقے میں منگل کے روز سی آر پی ایف اہلکاروں نے مشتبہ جنگجوؤں کی طرف سے رائفل چھیننے کی کوشش کو ناکام بنا دیا۔
سرکاری ذرائع نے بتایا کہ مشتبہ جنگجوؤں نے منگل کے روز اسلام آباد کے ریشی بازارمیں ایک کشمیری پنڈت کے گھر کی حفاظت پر مامور ایک سی آر پی ایف اہلکار کی آنکھوں میں مرچی پاؤڈر پھینک کر اس سے رائفل چھیننے کی کوشش کی۔
ذرائع نے کہا کہ تاہم وہاں تعینات اس کے ساتھیوں نے رائفل چھیننے کی اس کوشش کو ناکام بنا دیا۔مذکورہ ذرائع نے کہا کہ مشتبہ جنگجو جائے موقع سے فرار ہونے میں کامیاب ہوگئے ۔
ان کا مزید کہنا تھا کہ واقعے کے فوراً بعد سیکورٹی فورسز نے علاقے کو محاصرے میں لے کر ان افراد کی بڑے پیمانے پر تلاش شروع کی ہے ۔