وادی کے تین اضلاع میںاین آئی اے کے چھاپے

سرینگر//
قومی تحقیقاتی ایجنسی (این آئی اے ) نے منگل کے روز جموںکشمیر میں سرگرم پاکستان حمایت یافتہ نئی ملی ٹینٹ تنظیموں کے خلاف ایک بارپھر کریک ڈاؤن شروع کیا۔
این آئی اے نے کشمیر کے تین اضلاع اننت ناگ ، شوپیاں اور پلوامہ میں پانچ مقامات پر چھاپے مارے جس دوران ڈیجیٹل اور قابل اعتراض مواد برآمد کرکے ضبط کیا گیا ہے ۔
این آئی اے کے ایک ترجمان نے بتایا کہ منگل کے روز قومی تحقیقاتی ایجنسی (این آئی اے ) نے شوپیاں ، اننت ناگ اور پلوامہ اضلاع میں پانچ مقامات پر چھاپے مارے ۔
ترجمان نے بتایا کہ تفتیشی ایجنسی نے کالعدم ملی ٹینٹ تنظیموں کی نو تشکیل شدہ ذیلی شاخوں سے وابستہ ہائبرڈ ملی ٹینٹوں ‘بالائی ورکروں اور سہولیت کاروں کے گھروں اور ٹھکانوں پر چھاپے مارے ۔
ان کے مطابق جموں وکشمیر میں دہشت گردی ، تشدد اور تخریب کاری سے متعلق سرگرمیوں کے حوالے سے ان افراد کے خلاف تفتیش جاری ہے ۔
ترجمان نے بتایا کہ سٹکی بم ، آئی ای ڈیز ،فنڈز ، نشہ آور اشیائاور اسلحہ وگولہ بارود کو جمع اور تقسیم کرنے میں مذکورہ افراد کے ملوث ہونے کا شبہ ہے ۔
این آئی اے نے ملی ٹینٹ سازش کیس۲۱جون۲۰۲۲کو درج کیا تھا اور اس کا تعلق کالعدم دہشت گرد تنظیموں کی طرف سے جموں و کشمیر میں سٹکی بم، آئی ای ڈیز اور چھوٹے ہتھیاروں وغیرہ سے پرتشدد دہشت گردانہ حملے کرنے کے ساتھ ساتھ انٹرنیٹ کے ذریعے سازشیں رچانا بھی شامل ہیں۔
ترجمان نے مزید بتایا کہ پاکستان کی حمایت یافتہ تنظیمیں جموںکشمیر امن و امان اور فرقہ وارانہ ہم آہنگی کو درہم برہم کرنے کی خاطر مقامی نوجوانوں کو بنیاد پرستی کی اور راغب کرنے اور بالائی ورکروں کو متحرک کرنے میں بھی مصروف ہیں۔
این آئی اے ترجمان کے مطابق تحقیقات کے دوران منکشف ہوا ہے کہ اس سازش کے پیچھے پاکستان میں مقیم لوگ دہشت پھیلانے اور تخریبی سرگرمیوں کو انجام دینے کی خاطر مختلف سوشل میڈیا پلیٹ فارمز کا استعمال کر رہے ہیں، وہ وادی کشمیر میں اپنے ایجنٹوں اور کارکنوں کو اسلحہ وگولہ بارود، دھماکہ خیز مواد، منشیات وغیرہ پہنچانے کی خاطر ڈرون کا بھی استعمال کر رہے تھے ۔
جن ذیلی ملی ٹینٹ تنظیموں کے خلاف تحقیقات جاری ہے ان میں ٹی آر ایف، یونائٹیڈ لبریشن فرنٹ جموں وکشمیر، مجاہدین غزوتہ الہند، جموں وکشمیر فریڈم فائٹرس، کشمیر ٹائیگرس ، پی اے اے ایف وغیرہ شامل ہیں۔
ترجمان نے مزید بتایا کہ مذکورہ ذیلی تنظیمیں کالعدم دہشت گرد گروپوں جن میں لشکر طیبہ، جیش، حزب المجاہدین، البدر، القاعدہ اور دوسری تنظیمیں شامل ہیں کے ساتھ وابستہ ہیں۔