جموں//
سرینگر‘ جموں قومی شاہراہ بند رہنے کی وجہ سے جموں کے بھگوتی نگر بیس کیمپ سے یاتریوں کا کشمیر کی طرف روانہ ہونے کا سلسلہ پیر کو مسلسل تیسرے روز بھی معطل رہا۔
سرکاری ذرائع نے بتایا کہ قومی شاہراہ بند رہنے کی وجہ سے جموں کے بھگوتی نگر بیس کیمپ سے یاتریوں کا کشمیر کی طرف روانہ ہونے کا سلسلہ پیر کو بھی معطل رہا۔
ذرائع نے کہا کہ جموں میں خاص طور پر بھگوتی نگر بیس کیمپ پر زائد از۶ہزار یاتری درماندہ ہیں جبکہ زائد از۵ہزار یاتری ضلع رام بن کے چندر کوٹ میں درماندہ ہیں۔
ان کا کہنا تھا کہ پیر کو بھی یاتریوں کے کسی بھی جھتے کو کشمیر کی طرف روانہ ہونے کی اجازت نہیں ہے ۔انہوں نے مزید کہا کہ ملک کے مختلف حصوں سے یاتریوں کا جموں میں آنے کا سلسلہ جاری ہے ۔
سرکاری ذرائع کے مطابق کچھ یاتریوں کو ضلع کٹھوعہ کے لکھن پور اور کچھ کو سانبہ میں رکھا جا رہا ہے تاکہ جموں میں یاتریوں کے رش کو کم کیا جاسکے ۔انہوں نے کہا کہ قومی شاہراہ پر ٹریفک کی بحالی کے بعد ہی یاتریوں کو کشمیر کی طرف روانہ ہونے کی اجازت دی جائے گی۔
دریں اثنا درماندہ یاتریوں کو سہولیات بہم پہنچانے کے لئے تمام تر اقدام کئے جا رہی ہیں۔
صوبائی کمشنر جموں رمیش کمار اور دیگر اعلیٰ افسران صورتحال پر کڑی نگاہ رکھے ہوئے ہیں اور یاتریوں کو سیولہات بہم پہنچانے کے اقدام کا جائزہ لے رہے ہیں۔
ادھر کشمیر میں ننون پہلگام بیس کیمپ سے اتوار کی دوپہر سے جبکہ بالتل بیس کیمپ سے پیر کی صبح یاترا بحال ہوئی ہے ۔سرکاری ذرائع کے مطابق اب تک قریب ایک لاکھ یاتریوں نے پوتر گھپا کا درشن کیا ہے ۔
اس دوران موسم میں بہتری واقع ہونے کے ساتھ ہی شری امرناتھ جی یاترا پیر کی صبح بالتل بیس کیمپ سے بھی بحال ہوگئی۔
بتادیں کہ ناساز موسمی حالات کے پیش نظر یاترا جمعہ کے روز معطل کر دی گئی تھی تاہم ننون پہلگام بیس کیمپ سے اتوار کی دوپہر سے ہی یاترا بحال ہوئی تھی۔
سرکاری ذرائع نے بتایا کہ بالتل بیس کیمپ سے پیر کی صبح یاترا بحال ہوئی۔انہوں نے بتایا کہ موسم میں بہتری واقع ہونے کے ساتھ ہی ننون پہلگام بیس کیمپ سے اتوار کی دوپہر کو ہی یاترا بحال ہوئی تھی اور۶ہزار ۴سو۹۱یاتریوں پر مشتمل قافلے نے پوتر گھپا کا درشن کیا تھا۔
ان کا کہنا تھا کہ یاتریوں کی سہولیت کیلئے چاپر سروس کو بھی بحال کر دیا گیا ہے ۔
سرکاری ذرائع کے مطابق اتوار تک کل۹۳ہزار ۹سو ۲۹یاتریوں نے پوتر گھپا کا درشن کیا ہے ۔
۶۲دنوں تک محیط یہ سالانہ یاترا ۳۱؍اگست کو اختتام پذیر ہوگی۔
جموں وکشمیر انتظامیہ اور شری امرناتھ شرائن بورڈ نے یاترا کیلئے فقید المثال انتظامات کئے ہیں۔
