سرینگر میں حریت لیڈر ایاز اکبر کی جائیداد قرق:این آئی اے

سرینگر//
قومی تحقیقاتی ایجنسی (این آئی اے ) نے منگل کی صبح حریت (گ) کے لیڈر ایاز اکبر کی سرینگر کے شالہ ٹینگ میں واقع غیر منقولہ جائیداد قرق کر دی۔
سرکاری ذرائع نے بتایا کہ این آئی اے نے شالہ ٹینگ میں ایاز اکبر کی غیر منقولہ جائیداد قرق کرکے اس پر قرقی کا نوٹس چسپاں کی۔انہوں نے کہا کہ ایک کنال ۱۰ مرلے اراضی کی یہ جائیداد این آئی اے کی ایک عدالت کے احکامات پر منسلک کر دی گئی ہے ۔
جائیداد پر چسپاں قرقی نوٹس میں کہا گیا ہے ’’عوام الناس کو مطلع کیا جاتا ہے کہ محمد اکبر کھانڈے ولد عبدالرحمان کھانڈے ساکن ملورہ نزدیک امام البنا مسجد پولیس اسٹیشن پارمپورہ سرینگر کے نام درج موضع شالہ ٹینگ سرینگر میں غیر منقولہ جائیداد ایک کنال۱۰مرلے اراضی زیر سروے نمبر۳۱کو قرق کر دیا گیا ہے ‘‘۔
نوٹس میں مزید کہا گیا کہ اس جائیداد کو این آئی اے میں درج ایک کیس آر سی۲۰۱۷/۱۰/این آئی اے / ڈی ایل آئی مورخہ۳۱مئی۲۰۲۳کے تحت این آئی اے کی ایک خصوصی عدالت کے احکامات پرمنسلک کیا گیا ہے ۔بتادیں کہ محمد اکبر کھانڈے ، ایاز اکبر جو گذشتہ۶برسوں سے تہاڑ جیل میں بند ہیں، کے والد ہیں۔
این آئی اے نے پیر کے روز کپوارہ میں ظہور احمد شاہ وٹالی کے نام درج ۱۷جائیدادیں قرق کر دیں۔