جموں//
اننت ناگ ضلع میں ایک دہشت گردانہ حملے میں اپنے شوہر کو کھونے کے ایک ہفتہ بعد، گڑیا نے ادھم پور ضلع میں اپنے کچے مکان میں ایک بچے کو جنم دیا۔
۲۷سالہ دیپو کمار، جو جنوبی کشمیر ضلع کے جنگلات منڈی علاقے میں ایک سرکس میں کام کرتا تھا، کو لشکر طیبہ کے دہشت گردوں نے اس وقت گولی مار کر ہلاک کر دیا جب وہ ۲۹مئی کی رات تقریباً ساڈھے آٹھ بجے دودھ خریدنے بازار گیا تھا۔
ایک رشتہ دار سورما دیوی نے کہا’’گڑیا نے اتوار کو ایک بچے کو جنم دیا۔ اگرچہ یہ خاندان کے لیے خوشی کا لمحہ ہے، لیکن دیپو کو اپنے بچے کی ایک جھلک دیکھنے کے لیے یہاں نہ دیکھ کر دل دہلا دینے والا ہے‘‘ ۔کمار نے تقریباً دو سال قبل گڑیا سے شادی کی تھی۔
اس دوران اپنی پارٹی کے منجیت سنگھ نے کہا ہے’’متاثرہ خاندان کے تمام چھ افراد‘ اس کے والد، بھائی، بہنوئی، ان کے دو بچے اور اس کی بیوی‘ انتہائی غربت میں زندگی گزار رہے ہیں اور انہیں حکومت کی طرف سے مالی مدد فراہم کرنے کی ضرورت ہے‘‘۔
سنگھ نے مطالبہ کیا کہ لیفٹیننٹ گورنر، جموں و کشمیر، منوج سنہا ذاتی طور پر خاندان کا دورہ کریں اور ایک پختہ گھر‘روڈ کی تعمیر کا حکم دیں، اور کنبہ کے لیے پینے کے صاف پانی کا بندوبست کریں۔ (ایجنسیاں)