این آئی اے کے سرینگر اور بڈگام میں چھاپے

سرینگر//
قومی تحقیقاتی ایجنسی (این آئی اے ) نے جموں وکشمیر میں نئی جنگجو تنظیموں کے خلاف کریک ڈاؤن کو جاری رکھتے ہوئے بڈگام اور سرینگر میں چھاپے ماری کے دوران قابل اعتراض لٹریچر اور کئی ڈیجیٹل آلات کو بر آمد کیا۔
این آئی اے کے ایک ترجمان نے بتایا کہ قومی تحقیقاتی ایجنسی نے بدھ کے روز سرینگر اور بڈگام اضلاع میں تین مقامات پر چھاپے مارے ۔
ترجمان نے بتایا کہ ملی ٹینٹ اعانت کاروں‘ہابرڈ دہشت گردوں اور ان کے کیڈرز‘ جن کا تعلق پاکستان کی حمایت یافتہ متعدد کالعدم دہشت گرد تنظیموں اور نئی تشکیل شدہ ذیلی تنظیموں جن میں لشکر طیبہ ، جیش ، حزب المجاہدین ، البدر ، القاعدہ اور دوسری کالعدم تنظیمیں شامل ہیں‘ کے گھروں کی تلاشی لی گئی۔
ترجمان نے بتایا کہ سرینگر اور بڈگام میں دن بھر مشتبہ افراد کے رہائشی مکانوں کی تلاشی لی گئی ۔
این آئی اے ترجمان نے کہاکہ حال ہی میں تشکیل شدہ دہشت گروپوں بشمول ٹی آرایف، یونائٹیڈ لبریشن فرنٹ جموں وکشمیر،مجاہدین غزاوت الہند، جموں وکشمیر فریڈم فائٹرز ، کشمیر ٹائیگرز اور پی اے اے ایف شامل ہیں کی سرگرمیوں کے حوالے سے این آئی اے نے چھاپے مارے ۔
ان کے مطابق حال کے ایام میں قومی تحقیقاتی ایجنسی نے دہشت گرد سازش کیس کے سلسلے یں۱۵مقامات پر چھاپے مارے ۔
ترجمان نے مزید بتایا کہ این آئی اے نے۲۱جون۲۰۲۲کو متعدد کالعدم دہشت گرد تنظیموں کے خلاف کیس درج کیا ہے ۔ یہ مقدمہ ان تنظیموں کی طرف سے جموں وکشمیر میں سٹکی بموں، آئی ای ڈیز اور چھوٹے ہتھیاروں وغیرہ سے پر تشدد دہشت گردانہ حملوں کو انجام دینے کیلئے سماجی رابط سائٹوں کے ذریعے کی جانے والی سازشوں سے متعلق ہے ۔
ترجمان نے کہاکہ مذکورہ کالعدم تنظیمیں جموں وکشمیر میں امن و امان اور فرقہ وارانہ ہم آہنگی کو درہم برہم کرنے کے مقصد سے مقامی نوجوانوں کو بنیاد پرستی اور بالائی ورکروں کو متحرک کرکے تشدد کو ہوا دے رہے ہیں۔
این آئی اے تحقیقات کے مطابق نئی تشکیل پانے والی کالعدم تنظیموں کے کیڈرز اور کارکنان سٹکی بم ، آئی ای یز ، فنڈز ، نشہ آور اشیاء اور اسلحہ وگولہ بارود وغیرہ جمع کرنے اور انہیں ملی ٹینٹوں میں تقسیم کرنے میں ملوث پائے گئے ہیں اور یہ کہ مذکورہ تنظیمیں دہشت گردی، تخریبی سرگرمیاں ، تشدد اور بغاوت سے متعلق سرگرمیوں کو بڑھاوا دے رہے ہیں۔
این آئی اے نے کہاکہ تحقیقات کے دوران معلوم ہوا ہے کہ پاکستان میں مقیم ملی ٹینٹ اور ان کے کیڈرز وادی کشمیر میں سرگرم ملی ٹینٹوں کو اسلحہ وگولہ بارود، دھماکہ خیز مواد، منشیات وغیرہ پہنچانے کی خاطر ڈرون کا استعمال کر رہے ہیں جبکہ ہندوستان میں اپنے کارکنوں سے رابط قائم کرنے کی خاطر سوشل میڈیا سائٹوں کو بروئے کار لا رہے ہیں۔