سرینگر//
وادی میں۲۲ سے۲۴مئی تک جی ۲۰ کے سیاحتی ورکنگ گروپ کی میٹنگ میںکم از کم۶۰غیر ملکی مندوبین شرکت کریں گے۔
سیاحت کے مرکزی سکریٹری‘ اروند سنگھ نے کہا کہ کچھ رکن ممالک نے ابھی تک رجسٹریشن نہیں کرائی ہے لیکن رجسٹریشن کی آخری تاریخ۲۲ مئی ہے۔انہوں نے کہا کہ۲۲ سے۲۴ مئی تک ہونے والی میٹنگ میں تقریباً ۶۰غیر ملکی مندوبین کی شرکت متوقع ہے۔
سنگھ نے کہا کہ جموں کشمیر میں میٹنگ کا انعقاد نہ صرف سیاحت کے لیے اپنی صلاحیت کو ظاہر کرنا ہے بلکہ عالمی سطح پر خطے میں استحکام اور معمول کی بحالی کا اشارہ دینا ہے۔
مرکزی وزارت سیاحت کے مطابق ۲۲ مئی کو ’’فلم ٹورازم فار اکنامک گروتھ اینڈ کلچرل پرزرویشن‘‘ کے موضوع پر ایک ضمنی پروگرام کا انعقاد کیا جا رہا ہے، جس میں فلمی سیاحت کو فروغ دینے کی حکمت عملی پر توجہ مرکوز کی جا رہی ہے۔
عہدیداروں نے بتایا کہ اس تقریب میں جی ۲۰کے رکن ممالک، مدعو ممالک، بین الاقوامی تنظیموں اور صنعت کے اسٹیک ہولڈرز بشمول فلم انڈسٹری کے سرکردہ پروڈیوسرز کی شرکت ہوگی۔
سنگھ نے یہ بھی کہا کہ مندوبین ڈل جھیل میں شکارا پر سواری کریں گے اور اس کے کنارے ثقافتی پرفارمنس میں شرکت کریں گے۔
جی ۲۰ ایک بین الحکومتی فورم ہے جس میں ۱۹ممالک شامل ہیں‘جن میں ارجنٹینا، آسٹریلیا، برازیل، کینیڈا، چین، فرانس، جرمنی، بھارت، انڈونیشیا، اٹلی، جاپان، جمہوریہ کوریا، میکسیکو، روس، سعودی عرب، جنوبی افریقہ، ترکی، برطانیہ اور امریکہ، اور یورپی یونین۔