جی ٹونٹی اجلاس : تین دائروں والی سیکورٹی کا بندوبست:کمار

سرینگر/۱۸مئی
اے ڈی جی پی کشمیر‘ وجے کمار کا کہنا ہے کہ سرینگر میں جی ٹونٹی گروپ میٹنگ کیلئے سیکورٹی کے تمام انتظامات کئے ہیں۔انہوں نے کہا کہ تھری ٹائر سیکورٹی کا بندوبست ہوگا اور ڈرون مخالف سامان بھی نصب کیا جا رہا ہے جس کےلئے این ایس جی اور فوج کی مدد حاصل کی جا رہی ہے ۔
جھیل ڈل کے لئے پولیس ٹیم کے ساتھ ایم اے آر سی او ایس ( مارکوس) تعینات کیا جارہا ہے ۔ان کا کہنا تھا کہ جی ٹونٹی میٹنگ کو بحسن و خوبی اور کامیابی سے منعقد کرایا جائے گا۔
کمار نے جمعرات کو کہا کہ جی ٹونٹی سربراہی اجلاس کے حوالے سے جموں وکشمیر پولیس نے سبھی تیاریاں مکمل کی ہیں۔ان کے مطابق اجلاس کے شرکائ۲۲مئی کو وارد کشمیر ہونگے اور۲۵مئی کو واپس چلے جائیں گے ۔
اے ڈی جی پی نے بتایا کہ فضائی نگرانی کےلئے ڈرونز کا استعمال ہو رہا ہے جبکہ جھیل ڈل کی سیکورٹی مارکوز کمانڈوز نے سنبھال لی ہے ۔انہوں نے کہاکہ جی ٹونٹی اجلاس کے پر امن انعقاد کی خاطر سبھی تیاریاں مکمل کی جارہی ہی۔
بندشیں عائد کرنے کے بارے میں پوچھے گئے سوال کے جواب میں وجے کمار نے کہا” ہم یہ واضح کرنا چاہتے ہیں کہ جی ٹونٹی سربراہی اجلاس کے دوران کوئی پابندی عائد نہیں رہے گی “۔انہوں نے کہاکہ جو لوگ یہ افواہیں پھیلا رہے ہیں ان کی شناخت کرکے قانون کے کٹہرے میں کھڑا کیا جائے گا۔
ایڈیشنل ڈائریکٹر جنرل آف پولیس کشمیر رینج نے مزید بتایا کہ سیکورٹی فورسز کو ہدایت دی گئی ہے کہ وہ عوام کو نہ روکیں اور انہیں یہ بھی حکم دیا گیا ہے کہ لوگوں کو کسی قسم کی مشکل کا سامنا نہ کرناپڑے اس کےلئے بھی اقدامات اٹھائے جانے چاہئے ۔