جموں//
جموں کشمیر پولیس نے بدھ کو کہا کہ پونچھ ضلع میں سرحد پار سے ہتھیاروں اور منشیات کی اسمگلنگ میں ملوث ملک دشمن عناصر سے نمٹنے کیلئے ایک روڈ میپ تیار کیا گیا ہے۔
ایک پولیس ترجمان نے بتایا کہ سرحدی ضلع میں پونچھ کے سینئر سپرنٹنڈنٹ آف پولیس روہت باسکوترا کی صدارت میں ماتحت ملٹی ایجنسی سینٹر کی میٹنگ میں روڈ میپ کو حتمی شکل دی گئی اور اس میں فوج، سی آر پی ایف، بی ایس ایف اور انٹیلی جنس ایجنسیوں کے افسران نے شرکت کی۔
ترجمان نے کہا کہ میٹنگ ضلع کے مجموعی سیکورٹی منظر نامے کا جائزہ لینے کیلئے بلائی گئی تھی اور ۲۲ سے ۲۴ مئی کو سرینگر میں ہونے والے جی۲۰؍اجلاس سے متعلق خطرے سمیت مختلف امور پر تفصیلی تبادلہ خیال کیا گیا تھا۔
ترجمان نے کہا کہ ملک دشمن عناصر کی سرگرمیوں، ان کے طریقہ کار بشمول منشیات اور ہتھیاروں کی سمگلنگ (سرحد پار سے) کے خلاف ایک مناسب روڈ میپ تیار کیا گیا تھا۔
پولیس ترجمان نے کہا کہ تمام سپروائزری افسران کو ہدایت دی گئی ہے کہ وہ افرادی قوت کو موجودہ سیکورٹی صورتحال، چوکیوں کی تنصیب اور شرپسندوں، اوور گراؤنڈ ورکرز اور سابق عسکریت پسندوں کے خلاف احتیاطی کارروائی کے بارے میں بریف کریں۔
پونچھ کے ایس ایس پی نے ملک دشمن اور سماج دشمن عناصر کے ناپاک عزائم کو ناکام بنانے کے لیے تمام سیکورٹی ایجنسیوں کے درمیان قریبی تال میل پر بھی زور دیا۔
ترجمان نے کہا کہ افسران کو سوشل میڈیا پلیٹ فارمز پر نظر رکھنے کو بھی کہا گیا ہے۔