سرینگر//
جموں کشمیر وقف بورڈ نے وسطی کشمیر کے ضلع گاندربل کے رائل گنڈ کنگن علاقے میں واقع ایک زیارت گاہ میں عطیات کے غبن کے الزامات کی تحقیقات کا حکم جاری کیا ہے ۔
وقف بورڈ نے سال۲۰۰۰سے اب تک کے عطیات کا آڈٹ کرنے کیلئے سہ رکنی کمیٹی تشکیل دی ہے ۔
وقف بورڈ کی طرف سے جاری ایک حکمنامے میں کہا گیا کہ زیارت شریف رائل گنڈ کنگن وقف نوٹیفائیڈ جائیداد ہے جس کو سال ۱۹۸۵میں نوٹیفائی کیا گیا ہے ۔
حکمنامے میں کہا گیا کہ وقف بورڈ کی چیئرپرسن کو مذکورہ زیارت گاہ کے عطیات میں خرد برد اور غبن کرنے کے متعلق متعدد شکایات موصول ہوئی ہیں۔
وقف بورڈ کے حکمنامے میں کہا گیا’’شکایات میں یہ الزام لگایا گیا ہے کہ کئی برسوں سے زیارت کے بنیادی ڈھانچے کی تعمیر اور دیگر ترقیاتی کاموں اور سہولیات کیلئے ایک پیسہ بھی خرچ نہیں کیا گیا ہے ‘‘۔
حکمنامے کے مطابق چیئر پرسن نے شکایات کا سنجیدہ نوٹس لیتے ہوئے اس معاملے میں تحقیقات کرنے کا حکم دیا ہے ۔تحقیقات کیلئے سہ رکنی کمیٹی تشکیل دی گئی ہے جو سال۲۰۰۰ء کے بعد سے اب کے عطیات کا آڈٹ کرے گی۔
کمیٹی سے سات دنوں کے اندر اندر رپورٹ پیش کرنے کی ہدایت دی گئی ہے ۔