سرینگر//
کشمیر میں جی ۲۰ ورکنگ گروپ کی میٹنگ سے پہلے، مرکزی داخلہ سکریٹری اجے کمار بھلا نے بدھ کو یہاں پولیس ہیڈکوارٹر کا دورہ کیا اور سینئر افسران کی میٹنگ کی صدارت کی۔
حکام نے یہاں بتایا کہ بھلا کے ساتھ انٹیلی جنس بیورو کے ڈائریکٹر تپن کمار ڈیکا بھی تھے۔
میٹنگ میں جموں کشمیر کے ڈائریکٹر جنرل آف پولیس دلباغ سنگھ، ایڈیشنل چیف سکریٹری آر کے گوئل، اسپیشل ڈی جی سی آئی ڈی آر آر سوین، اے ڈی جی پی جموں مکیش سنگھ، اے ڈی جی پی ہیڈ کوارٹر پی ایچ کیو ایم کے سنہا، آئی جی پی ٹریفک جموں و کشمیر وکرم جیت سنگھ اور ڈویڑنل کمشنر کشمیر وجے کمار بھدوری سمیت دیگر نے شرکت کی۔
عہدیداروں نے بتایا کہ ڈی جی پی اور دیگر افسران نے مرکزی داخلہ سکریٹری کو جموں و کشمیر پولیس کے کام کرنے اور مرکز کے زیر انتظام علاقے میں امن برقرار رکھنے کیلئے اٹھائے گئے اقدامات کے بارے میں بتایا۔
بھلا کا پولیس ہیڈ کوارٹر کا دورہ ایس کے آئی سی سی میں سیکورٹی جائزہ اجلاس کی صدارت کرنے کے ایک دن بعد آیا ہے۔
۲۲ سے ۲۴ مئی تک ہونے والی آئندہ جی ۲۰ ورکنگ گروپ میٹنگ کی تیاریوں کا جائزہ لینے کے علاوہ، انہوں نے راجوری اور پونچھ حملوں کے تناظر میں جموں و کشمیر کی مجموعی سیکورٹی صورتحال کا بھی جائزہ لیا۔