جنوبی کشمیر میں سیکورٹی کے غیر معمولی انتظامات

سرینگر//
جنوبی کشمیر کے کئی علاقوں میں ہفتے کے روز سیکورٹی فورسز نے راہگیروں، موٹر سائیکل سواروں کی تلاشی لی جس دوران ان کے شناختی کارڈ باریک بینی سے چیک کئے جارہے تھے ۔
اطلاعات کے مطابق جنوبی کشمیر کے کولگام ، اننت ناگ اور پلوامہ اضلاع میں پچھلے کئی دنوں سے سیکورٹی کے غیر معمولی انتظامات کے بیچ ضلع بھر میں ناکوں کا جال بچھایا گیا ہے ۔
ذرائع نے بتایا کہ ہفتے کے روز کولگام ضلع کے کئی علاقوں میں ناکہ چیکنگ کے دوران مسافروں، راہگیروں اور سکوٹی سواروں کی باریک بینی سے تلاشی لی گئی اور ان کے شناختی کارڈ بھی چیک کئے جارہے تھے ۔
معلوم ہوا ہے کہ سیکورٹی فورسز نے ضلع میں اہم شاہراہوں اور چوراہوں پر ناکے لگا ئے ہیں جہاں پر کسی بھی گاڑی کو بغیر تلاشی کے آگے جانے کی اجازت نہیں دی جارہی ہے ۔
جنوبی کشیر میں کئی مقامات پر عارضی چیک پوائنٹس قائم کئے گئے ہیں جہاں نہ صرف گاڑیوں کو روک کر ان کی تلاشی لی جاتی ہے بلکہ مسافروں کے شناختی کارڈ بھی چیک کئے جاتے ہیں۔
ذرائع کے مطابق سماج دشمن عناصر کے منصوبوں کو ناکام بنانے کی خاطر جنوبی کشمیر میں جگہ جگہ سیکورٹی فورسز کی تعیناتی عمل میں لائی گئی ہے ۔