بی جے پی کشمیر میں بھی پھل پھول رہی ہے : کول

سرینگر//
بھارتیہ جنتا پارٹی (بی جے پی) جموںکشمیر کے جنرل سکریٹری ‘اشوک کول کا کہنا ہے کہ بی جے پی ملک بھر کی طرح کشمیر میں بھی پھل پھول رہی ہے ۔
کول نے کہا کہ بی جے پی جموں و کشمیر میں اسمبلی انتخابات لڑنے کیلئے تیار ہے ۔
بی جے پی جنرل سکریٹری نے ان باتوں کا اظہار جمعرات کو یہاں پارٹی کے یوم تاسیس کے سلسلے میں منعقدہ ایک تقریب کے حاشیہ پر نامہ نگاروں کے ساتھ بات کرنے کے دوران کیا۔
کول نے کہا’’آج بی جے پی کا یوم تاسیس ہے یہ پارٹی۶؍اپریل۱۹۸۰کو بنی تھی اور آج اس کا۴۲واں سال ہے ‘‘۔ان کا کہنا تھا کہ ملک بھر کے ساتھ ساتھ جموںکشمیر میں بھی بی جے پی کا یوم تاسیس منایا جا رہا ہے ۔
بی جے پی جنرل سکریٹری نے کہا کہ ہمارے وزیر اعظم نریندر مودی جی پارٹی کے کروڑوں کارکنوں سے خطاب کریں گے جس میں ایک پیغام ہوگا۔انہوں نے کہا کہ بی جے پی سرکار نے گذشتہ ۹برسوں کے دوران ملک اور جموں وکشمیر کیلئے جو ترقی کے کام کئے ہیں وہ سب ہمارے سامنے ہیں۔
جموں وکشمیر میں اسمبلی انتخابات کے بارے میں پوچھے جانے پر کول نے کہا کہ جب یہاں انتخابات ہوں گے ہم ان کے لئے پوری طرح سے تیار ہیں۔