’ہم کشمیری پنڈتوں کے ساتھ رابطے میں ہیں تاکہ ان کی سیکورٹی کو مزید مستحکم کیا جاسکے‘

سرینگر//
سی آر پی ایف (آپریشنز) کشمیر کے انسپکٹر جنرل ایم ایس بھاٹیہ کا کہنا ہے کہ سیکورٹی فورسز وادی بھر میں رہائش پذیر کشمیری پنڈتوں کے ساتھ مسلسل رابطے میں ہیں تاکہ ان کی سیکورٹی کو مزید مستحکم کیا جا سکے ۔
بھاٹیہ نے کہا کہ کشمیری پنڈتوں کیلئے سیکورٹی کا پختہ بندوبست کیا جا رہا ہے اور ہر حال میں ان کے تحفظ کو یقینی بنایا جا ئے گا۔
انسپکٹر جنرل نے ان باتوں کا اظہار جمعے کو جنوبی کشمیر کے بجبہاڑہ میں نامہ نگاروں کے سوالوں کے جواب دینے کے دوران کیا۔
بھاٹیہ نے کہا’’کشمیر میں جہاں بھی پنڈت لوگ رہائش پذیر ہیں ہم ان کے ساتھ مسلسل رابطے میں ہیں۔ ان کو بھر پور سیکورٹی کور فراہم کرنے اور ان کی سیکورٹی کو مزید بڑھانے کی کوششیں کی جا رہی ہیں‘‘۔ان کامزید کہنا تھا’’ وادی میں موجود پنڈتوں کی سیکورٹی کا روزانہ بنیادوں پر جائزہ لیا جاتا ہے ۔ کشمیری پنڈتوں کیلئے سیکورٹی کا پختہ بندوبست کیا جا رہا ہے اور ہر حال میں ان کے تحفظ کو یقینی بنایا جا ئے گا‘‘۔
کشمیر میں موجود جنگجوؤں کی تعداد کے بارے میں پوچھے جانے پر بھاٹیہ کہنا تھا’’جنگجوؤں کی تعداد بڑھتی اور گھٹتی رہتی ہے لہذا یہ کہنا مشکل ہے کہ ان کی صحیح تعداد کتنی ہے ‘‘۔انہوں نے کہا’’جنوبی کشمیر میں حال ہی میں دو جنگجو مارے گئے اور جنگجوؤں کے خلاف آپریشنز مربوط انداز میں جاری ہیں۔‘‘