ڈھاکہ// ہندوستانی خواتین کی انڈر 20 فٹ بال ٹیم کی کوچ میمول راکی نے سیف انڈر 20 خواتین چمپئن شپ میں بنگلہ دیش کے ساتھ بغیر گول کے ڈرا کھیلنے کے بعدپیر کو اعتراف کیا کہ کھلاڑی مواقع کو گول میں تبدیل نہیں کرپارہے ہیں بھوٹان کو 12-0 سے ہرانے کے بعد ہندوستانی ٹیم بنگلہ دیش کے خلاف ایک بھی گول نہیں کر سکی۔ فائنل میں جگہ بنانے کے لیے ہندوستان کو منگل کے روز نیپال کا سامنا کرنا ہے اور کوچ راکی پرامید ہیں کہ کھلاڑی پچھلے میچ کی غلطیوں کو سدھارنے میں کامیاب ہو جائیں گے۔
راکی نے کہا، ’’ہمیں کل کے میچ میں گول کرنا ہی ہوگا اور فائنل میں جگہ بنانی ہوگی۔ فٹ بال کا کھیل گول کرنے کے بارے میں ہے۔ لڑکیوں کو مواقع پیدا کرتے دیکھنا اچھا لگتا ہے، لیکن سب سے اہم بات یہ ہے کہ وہ ان مواقع پرگول کر سکیں۔ ہمیں کہیں نہ کہیں اس کو درست کرنے کی ضرورت ہے۔”
انہوں نے کہا، ’’ہم نیپال کو ہلکے میں نہیں لے رہے ہیں۔ وہ ایک اچھی ٹیم ہیں۔ ہم نے اسے بھوٹان اور بنگلہ دیش کے خلاف کھیلتے دیکھا ہے۔ یہ ہمارے لیے آسان نہیں ہو گا اور ہمیں اپنی پوری طاقت لگانی پڑے گی۔
کوچ راکی نے کہا کہ ان کی ٹیم ڈرا کے باوجود مایوس نہیں ہوئی اور نیپال کے خلاف جیت درج کرنے اور فائنل میں جگہ بنانے کے لیے پوری طرح تیار ہے۔ جب دونوں ٹیمیں سیف انڈر-18 ویمنز چیمپئن شپ 2022 میں آمنے سامنے آئی تھیں تو ہندوستان نے نیپال کو 5-1 سے شکست دی تھی۔
راکی نے کہا، "جب بھی کوئی ٹیم سیف چیمپئن شپ میں ہندوستان کا سامنا کرتی ہے، وہ بہتر کارکردگی دکھانے کی کوشش کرتی ہے۔ نیپال بھی اپنی بہترین کارکردگی دکھانا چاہے گا۔ اس خطے کی تمام ٹیمیں تیزی سے بہترہوتی جارہی ہیں اور ہم دوبارہ اسی نتیجے کی توقع نہیں کر سکتے۔ میں صرف اپنی لڑکیوں سے سخت محنت کی توقع کرتی ہوں اورمجھے یقین ہے ہم کل جیت سکتے ہیں۔