سرینگر/۲۳جنوری
جموں کشمیر اپنی پارٹی کے بانی سید الطاف بخاری نے پیر کے روز کہاکہ جموںکشمیر کی ایک انچ زمین بھی غیر مقامی لوگوں کو فراہم کرنے کی اجاز ت نہیں دیں گے ۔
بخاری نے سرکار سے مطالبہ کیا کہ سرکاری اراضی اور کاہچرائی پر قبضہ ہٹانے کی مہم کے دوران غریب لوگوں کو مستثنیٰ رکھا جائے ۔
ان باتوں کا اظہار موصوف نے یہاں ایک پریس کانفرنس کے دوران کیا۔
بخاری نے کہاکہ سٹیٹ لینڈ اور کاہچرائی پر قبضہ ہٹانے کی مہم کے دوران غریبوں کے ساتھ چھیڑ چھاڑ نہیں کی جانی چاہئے ۔
اپنی پارٹی کے صدر نے کہاکہ جن لوگوں نے سرکاری زمین کے ایک بڑے حصے پر قبضہ کیا ہے اُن کے خلاف سخت کارروائی ہونی چاہئے لیکن غریبوں اور مفلوک الحال لوگوں کو اس مہم سے باہر رکھا جانا چاہئے ۔انہوں نے مزید بتایا کہ سرکار کی جانب سے جو اراضی تحویل میں لی جارہی ہیں اُس سے غیر مقامی لوگوں کو نہیں دینا چاہئے ۔
بخاری کے مطابق جموں کشمیر میں صرف پانچ فیصد اراضی غیر مقامی لوگوں کو صنعتی مقاصد کے لئے فراہم کی جاسکتی ہے ۔انہوں نے سرکار سے مطالبہ کیا کہ سرکاری اراضی سے غیر قانونی قبضے کو چھڑانے کی مہم کے دوران غریبوں کے ساتھ کوئی چھیڑ چھاڑ نہیں کی جانی چاہئے ۔
کوکا پرے کے بارے میں پوچھے گئے سوال کے جواب میں الطاف بخاری نے کہاکہ کوکا پرے دیگر سیاستدانوں سے بہتر تھے ۔انہوں نے کہاکہ کوکا پرے نے جو کچھ بھی کیا سب کے سامنے کیا جبکہ دوسرے سیاستدانوں نے پردے کے پیچھے وہی کام کئے لہذا جہاں تک میری رائے ہے کوکا پرے باقی سیاستدانوں سے بہتر تھے ۔