جموں/ 18 جنوری
جموں و کشمیر حکومت نے گزشتہ سال دسمبر میں یہاں سدھرا علاقے میں ہوئے انکاونٹر کی مجسٹریل جانچ کا حکم دیا ہے جس میں چار دہشت گرد مارے گئے تھے۔
ایڈیشنل ڈسٹرکٹ مجسٹریٹ کے جاری کردہ ایک حکم کے مطابق، اسسٹنٹ کمشنر، جموں، پیوش دھوترا کو 28 دسمبر کو سدھرا میں پولیس چوکی کے قریب ہونے والے انکاو¿نٹر کی تحقیقات کے لیے ایک انکوائری افسر کے طور پر مقرر کیا گیا ہے۔
دھوترا نے بدھ کو ایک نوٹس میں کہا،”مجھے مجسٹریٹ انکوائری کرنے اور ضلع مجسٹریٹ، جموں کو رپورٹ پیش کرنے کی ہدایت دی گئی ہے“۔
تحقیقات کا حکم قومی انسانی حقوق کمیشن کی طرف سے جاری کردہ رہنما خطوط کے مطابق دیا گیا ہے۔
افسر نے کہا، ”معاملے کے حقائق کو اکٹھا کرنے اور منصفانہ اور شفاف طریقے سے انکوائری کرنے کے لیے، کوئی بھی شخص دفتر میں آکر آج سے 21 جنوری تک اپنا بیان ریکارڈ کرسکتا ہے۔“
چار بھاری ہتھیاروں سے لیس دہشت گرد، جو پاکستان سے دراندازی کے بعد ایک ٹرک میں کشمیر جا رہے تھے، یہاں سیکورٹی فورسز کے ساتھ ’چانس انکاونٹر‘ میں مارے گئے۔
ان کے قبضے سے سات اے کے اسالٹ رائفلز، ایک ایم فور رائفل، تین پستول اور بڑی مقدار میں گولہ بارود بھی برآمد کیا گیا۔