جموں//
جموں کشمیر کی سرمائی راجدھانی جموں میں کشمیری پنڈت ملازمین نے راج بھون کے باہر اپنی مانگوں کو لے کر احتجاجی مظاہرئے کئے ۔
یو این آئی اردو کے نامہ نگار نے بتایا کہ جموں میں راج بھون کے باہر کشمیری پنڈت ملازمین کی ایک بڑی تعداد نے دھرنا دیا اور احتجاجی مظاہرئے کئے ۔انہوں نے بتایا کہ پیر کی صبح کشمیری پنڈت ملازمین کی ایک بڑی تعداد راج بھون جموں کے باہر جمع ہوئے اور نعرے بازی شروع کی۔
نامہ نگاروں سے بات چیت کے دوران مظاہرین نے کہاکہ آن لائن دھمکی کے بعد وہ اب کشمیر جانے کو تیار نہیں ہے ۔انہوں نے کہا کہ جموں وکشمیر کی انتظامیہ کو کشمیر میں تعینات ہندو ملازمین کو جموں ٹرانسفر کرنا چاہئے ۔
نامہ نگارنے بتایا’’پچھلے چھ ماہ سے وہ مسلسل احتجاج پر بیٹھے ہوئے ہیں لیکن سرکار کی جانب سے ان کی مانگوں کو پورا نہیں کیا جارہا ہے ‘‘۔
مظاہرین نے مزید بتایا کہ کشمیر میں ٹارگیٹ کلنگ کے واقعات رونما ہونے کے بعد ہندو ملازمین کو پھر سے دھمکی دی گئی ہے لہذا اس سب کو دھیان میں رکھ کر سرکار کو اب ملازمین کے حق میں فیصلہ لینا چاہئے ۔
مظاہرین نے کہاکہ چونکہ لگاتار انہیں دھمکیاں دی جارہی ہیں لہذا اس کو مد نظر رکھتے ہوئے سرکار کو کشمیری پنڈت ملازمین کو جموں میں ہی تعینات کرنے کا فیصلہ لینا چاہئے اور جب حالات پوری طرح سے معمول پر آئیں تب وہ وادی میں اپنی خدمات انجام دینے کے لئے تیار ہیں۔