بارہمولہ کے پٹن علاقے میں دو منشیات فروش گرفتار:پولیس

سرینگر/18 نومبر
پولیس کا کہنا ہے کہ انہوں نے شمالی کشمیر کے زانگام پٹن علاقے میں دو منشیات فروشوں کو گرفتار کرکے 3 سو کلو فکی جیسا مواد بر آمد کیا ہے ۔
ایک پولیس ترجمان نے اپنے ایک بیان میں کہا کہ پولیس نے زانگام پٹن علاقے میں معمول کے ناکہ کے دوران ایک آلٹو گاڑی جو بارہمولہ سے سری نگر کی طرف جا رہی تھی، کو رکنے کا اشارہ کیا۔
ترجمان نے کہا کہ گاڑی سے تلاشی کے دوران قریب تین سو کلو فکی جیسا مواد بر آمد کیا گیا اور دو افراد کو موقع پر ہی گرفتار کیا گیا اور گاڑی کو بھی ضبط کیا گیا۔
بیان میں گرفتار شدگان کی شناخت جہانگیر احمد لون ولد محمد صابر لون اور عاشق حسین مغلو ولد محمد رمضان مغلو ساکنان چناد بارہمولہ کے بطور ہوئی ہے ۔
پولیس بیان میں کہا گیا کہ اس ضمن میں پولیس اسٹیشن پٹن میں ایک کیس درج کیا گیا اور مزید تحقیقات شروع کی گئیں۔
بیان میں مزید کہا گیا کہ علاقے کے لوگوں نے بارہمولہ پولیس کی کاوشوں کی سراہنا کی اور انہیں منشیات کی وبا کے قلع قمع کو یقینی بنانے کے لئے تعاون کرنے کی خواہش ظاہر کی۔