جموں/14 نومبر
جموں وکشمیر کے ضلع ڈوڈہ کے اثار علاقے میں پیر کی صبح ایک گاڑی دریائے چناب میں گر جانے سے تین سرکاری ملازم لقمہ اجل بن گئے جبکہ چوتھا زخمی ہوگیا۔
سرکاری ذرائع نے بتایا کہ ڈوڈہ میں محکمہ روڈ اینڈ بلڈنگس کے چار ملازمین ایک گاڑی میں سفر کر رہے تھے کہ اثار علاقے کے نزدیک صبح کے قریب ساڑھے دس بجے گاڑی سڑک سے لڑھک کر دریائے چناب میں گر گئی۔
ذرائع نے کہا کہ اس حادثے کے نتیجے میں تین ملازموں کی بر سر موقع ہی موت واقع ہوگئی جبکہ چوتھا زخمی ہوگیا۔
ہلاک شدگان کی شناخت محمد رفیق، جو پی ڈبیلو ڈی کے ایگزیکٹیو انجینئر تھے ‘ اور حفیظ احمد جو ڈرائیور ہیں تیسرے کی شناخت ابھی معلوم نہیں ہوئی ہے جبکہ زخمی کی شناخت سریندر کمار کے بطور ہوئی ہے ۔
ان کا کہنا تھا کہ زخمی کو نکال کر علاج و معالجے کے لئے گورنمنٹ میڈیکل کالج ڈوڈہ منتقل کیا گیا ہے جہاں اس کی حالت نازک بتائی جاتی ہے ۔
دریں اثنا پولیس نے اس ضمن میں ایک کیس درج کرکے مزید تحقیقات شروع کی ہیں۔
