فوج پی او کے کو واپس لینے کےلئے کارروائی کےلئے تیار:اوجلا

سرینگر/یکم نومبر
چنار کورکے کمانڈر‘ لیفٹیننٹ جنرل اے ڈی ایس اوجلا نے منگل کو کہا کہ وزیر دفاع راج ناتھ سنگھ نے پیر کو پاکستان کے زیر قبضہ کشمیر (پی او کے) کو واپس لینے کا اشارہ دینے کے بعد ہندوستانی فوج ’کارروائی کے لئے پوری طرح تیار‘ ہے۔
لیفٹیننٹ جنرل اوجلا نے کہا کہ ہندوستانی فوج پوری طرح تیار ہے اور ہم حکومت کے حکم پر کسی بھی کارروائی کےلئے تیار ہیں۔
سرینگر میں ایک ’شوریہ دیوس‘ پروگرام سے خطاب کرتے ہوئے راج ناتھ سنگھ نے کہا تھا”ہم نے ابھی شمال کی طرف چلنا شروع کیا ہے، ہمارا سفر اس وقت مکمل ہوگا جب ہم ۲۲ فروری ۱۹۹۴ کو ہندوستانی پارلیمنٹ کی طرف سے متفقہ طور پر منظور کی گئی قرارداد کو گلگت بلتسان پہنچ کر نافذ کریں گے“۔
کمانڈنگ آفیسر نے وزیر دفاع کے اس تبصروں پر سرینگر میں صحافیوں سے بات چیت کر تے ہوئے کہا”جب بھی مرکزی حکومت اس طرح کا فیصلہ لیتی ہے، ہمارے پاس آرڈر آئیں گے اور ایسی صورتحال میں، ہم پوری طرح سے تیار ہیں۔ اپنی روایتی طاقت کے علاوہ ہم خود کو جدید طریقے سے بھی مضبوط کر رہے ہیں، تاکہ ایسی صورتحال میں ہمیں پیچھے مڑ کر نہ دیکھنا پڑے“۔
پندرہویں کور کے کمانڈر نے یہ بھی کہا کہ پچھلے ۷۵ سالوں میں ہندوستانی فوج کی صلاحیتوں کو اپ گریڈ کیا گیا ہے۔ انہوں نے مزید کہا کہ ہماری تیاری بہت اچھی سطح پر ہے اور جب بھی اسے ظاہر کرنے کی ضرورت ہوگی، آپ کو بہت مختلف اثر نظر آئے گا۔
موجودہ صورتحال پر بات کرتے ہوئے لیفٹیننٹ جنرل اوجلا نے کہا کہ اس وقت صورتحال مکمل طور پر قابو میں ہے لیکن جب بھی موقع ملتا ہے دراندازی کی کوششیں ہوتی ہیں تاہم بھارتی فوج ہماری سرحد کی حفاظت کے لیے پوری قوت کے ساتھ تیار ہے۔
جنگ بندی کے اعلان اور آرٹیکل ۰۷۳ کی منسوخی کے بعد کی صورتحال کے بارے میں پوچھے گئے سوال کے جواب میں لیفٹیننٹ جنرل اوجلا نے کہا”وادی میں امن کی بحالی کے پیش نظر یہ بہت اچھا سال رہا ہے، جس میں ۳۲ سالوں میں سب سے کم دراندازی دکھائی گئی ہے۔ اس پورے سال میں اکتوبر تک صرف آٹھ دہشت گردوں نے دراندازی کی کوشش کی جن میں سے تین کو مار گرایا گیا۔“ (اے این آئی)