جنوبی کشمیر کے ضلع شوپیاں میں مشتبہ ملی ٹنٹوں کے ہاتھوں کشمیری پنڈت ہلاک

سرینگر/15 اکتوبر
جنوبی کشمیر کے ضلع شوپیاں کے چودھری گنڈ علاقے میں ہفتے کے روز مشتبہ ملی ٹنٹوں نے ایک کشمیری پنڈت کو گولیاں مار کر جان بحق کر دیا۔
سرکاری ذرائع نے بتایا کہ شوپیاں کے چودھری گنڈ علاقے میں ملی ٹنٹوں نے ایک کشمیری پنڈت پر اس کی رہائش گاہ پر نزدیکی سے گولیاں چلائیں۔انہوں نے کہا کہ مذکورہ پنڈت کو زخمی حالت میں نزدیکی ہسپتال پہنچایا گیا جہاں ڈاکٹروں نے انہیں مردہ قرار دیا۔
ہلاک شدہ پنڈت کی شناخت پنڈت پورن کرشن بٹ ولد تارک ناتھ بٹ کے بطور ہوئی ہے ۔
دریں اثنا کشمیر زون پولیس نے اپنے ٹویٹر ہینڈل پر واقعے کے متعلق ایک ٹویٹ میں کہا”شوپیاں چودھری گنڈ میں ملی ٹنٹوں نے اقلیتی فرقے کے ایک عام شہری شری پورن کرشن بٹ پر گولیاں برسائیں جب وہ اپنے میوہ باغ کی طرف جا رہے تھے “۔
ٹویٹ میں کہا گیا”انہیں فوری طور ہسپتال منتقل کیا گیا جہاں وہ دم توڑ گئے “۔
پولیس ٹویٹ میں کہا گیا کہ علاقے کو محاصرے میں لیا گیا ہے اور تلاشی آپریشن جاری ہے ۔