سرینگر/27 ستمبر
وادی کشمیر کو ملک کے باقی حصوں کے ساتھ جوڑنے والی سرینگر، جموں قومی شاہراہ کو ضلع رام کے کیفٹڑیا موڑ پرمرمتی کام کے پیش نظر منگل کی صبح ٹریفک کی نقل و حمل کے لئے بند کر دیا گیا۔
جموں و کشمیر ٹریفک پولیس نے ٹویٹ کرکے کہا کہ ٍ قومی شاہراہ کو رام بن میں کیفٹریا موڑ پر جاری مرمتی کام کے پیش نظر ٹریفک کی نقل و حمل کےلئے بند کر دیا گیا ہے ۔
ٹویٹ میں انہوں نے کہا کہ تاہم جنوبی کشمیر کے ضلع شوپیاں کو صوبہ جموں کے ضلع پونچھ کے ساتھ جوڑنے والے تاریخی مغل روڈ پر ٹریفک کی نقل و حمل حسب معمول جاری ہے ۔
قابل ذکر ہے کہ وادی کے لئے شہہ رگ کی حیثیت رکھنے والی اس قومی شاہراہ پر ٹریفک بند ہونے سے لوگوں کو گونا گوں مشکلات سے دوچار ہونا پڑتا ہے ۔
لوگوں کا کہنا ہے کہ قومی شاہراہ کے بند ہوتے ہی وادی میں جہاں ایک طرف اشیائے ضروریہ کی اچانک قلت پیدا ہوجاتی ہے وہیں گراں بازاری کا بازار اس قدر گرم ہوجاتا ہے کہ غریب لوگوں کا جینا از بس مشکل ہوجاتا ہے ۔
انہوں نے کہا کہ شاہراہ کے بند ہونے سے میوہ صنعت سے وابستہ لوگوں کا بے تحاشا مشکلات سے دو چار ہونا پڑتا ہے ۔
