کورونا بحران کی وجہ سے فوج میں بھرتی متاثر: وزارت دفاع

نئی دہلی// حکومت نے آج کہا کہ کورونا بحران کے سبب لگائی گئی پابندیوں کی وجہ سے سال 2020 اور 2021 میں مسلح افواج میں بھرتی کی کارروائی متاثر ہوئی ہے۔
وزیر مملکت برائے دفاع اجے بھٹ نے پیر کے روز راجیہ سبھا میں وقفہ سوالات کے دوران کہا کہ گزشتہ دو سالوں میں کووڈ کی پابندیوں کی وجہ سے بھرتی ریلی کا انعقاد متاثر ہوا ہے۔ انہوں نے کہا کہ امیدواروں کی ایک بڑی تعداد بھرتی ریلی میں حصہ لیتی ہے، اس لیے کووڈ کی وجہ سے پچھلے برسوں کی طرح ان کا انعقاد نہیں کیا جا سکا۔ انہوں نے کہا کہ ایئر فورس اور بحریہ میں آن لائن بھرتی کا عمل جاری ہے اور بڑی تعداد میں افسران کو بھرتی کیا گیا ہے۔
جب ان سے مسلح افواج میں خواتین کے جنگی کردار کے بارے میں پوچھا گیا تو ان کا کہنا تھا کہ کہیں بھی کوئی بندش نہیں ہے اور جہاں کچھ خدشات ہیں، ان پر بات چیت کی جا رہی ہے۔
وزیر دفاع راج ناتھ سنگھ نے بھرتی سے متعلق سوال کے جواب میں مداخلت کرتے ہوئے کہا کہ ہر سال افواج کی طرف سے 90 سے 100 بھرتی ریلیاں منعقد کی جاتی ہیں۔ ان میں اس بات کا خیال رکھا جاتا ہے کہ ملک کا ایک بھی ضلع اس سے نہ چھوٹے۔ انہوں نے کہا کہ یہ ایک مسلسل کارروائی ہے اور ایک ریلی میں کم از کم 6 سے 8 اضلاع کا احاطہ کیا جاتا ہے۔
مسلح افواج میں درج فہرست ذات و قبائل اور دیگر پسماندہ طبقات سے تعلق رکھنے والے افسران کے اعداد و شمار کے بارے میں پوچھے جانے پر مسٹر بھٹ نے کہا کہ اس سے متعلق ڈیٹا اکٹھا کرکے اطلاع دی جائے گی۔
(یواین آئی)