دہلی میں جدید بایو گیس پلانٹ کا افتتاح، روزانہ 200 ٹن گوبر کی پروسیسنگ ہوگی

نئی دہلی، 19 اکتوبر (یو این آئی) صاف ایندھن کی پیداوار کی جانب ایک اہم قدم اٹھاتے ہوئے دہلی کی وزیر اعلیٰ ریکھا گپتا نے پیر کو نجف گڑھ کے گوئلا ڈیری علاقے میں روزانہ 200 میٹرک ٹن گوبر کی پروسیسنگ کی صلاحیت رکھنے والے جدید بایو گیس پلانٹ کا افتتاح کیا۔
دہلی میونسپل کارپوریشن کی جانب سے 16 کروڑ روپے کی لاگت سے تعمیر کردہ یہ پلانٹ گوبر کی سائنسی طریقے سے پروسیسنگ، صاف ایندھن کی پیداوار اور ماحول کے تحفظ میں اہم کردار ادا کرے گا۔ اس سے گوبر کو نالیوں میں بہنے سے روکنے میں مدد ملے گی، جہاں سے یہ دریائے جمنا کی آلودگی میں اضافے کا سبب بنتا ہے۔
اس منصوبے سے صفائی ستھرائی کی صورت حال بہتر بنانے اور مویشی پالنے والوں کی آمدنی میں اضافہ کرنے میں بھی مدد ملے گی۔
اس موقع پر دہلی حکومت کے وزیر آشیش سود، میئر پرویش واہی، ڈپٹی میئر ڈاکٹر مونیکا پنت، رکن اسمبلی سندیپ سہراوت اور منصوبے سے وابستہ دیگر نمائندے بھی موجود تھے۔
قابل ذکر ہے کہ گزشتہ 18 ماہ کے دوران دہلی میں تین بایو گیس پلانٹ کام شروع کر چکے ہیں، جبکہ دارالحکومت کی ڈیری کالونیوں میں مزید چھ پلانٹس کی تعمیر کا کام جاری ہے۔
وزیر اعلیٰ ریکھا گپتا نے الزام لگایا کہ سابقہ حکومتوں نے دہلی کی ڈیری کالونیوں میں بنیادی سہولتوں، بشمول نالیوں، نکاسیٔ آب کے نظام، پانی کی فراہمی، کچرا جمع کرنے اور گوبر کی نکاسی جیسے مسائل پر خاطر خواہ توجہ نہیں دی۔
گپتا کے مطابق، دہلی میں کئی برسوں تک کوئی بایو گیس پلانٹ قائم نہیں کیا گیا، جس کی وجہ سے گوبر کو مناسب طریقے سے ٹھکانے لگانے کا مسئلہ برقرار رہا۔ انہوں نے کہا کہ ان کی حکومت نے گزشتہ 18 ماہ میں تین بایو گیس پلانٹس کو فعال کیا ہے، جبکہ مزید چھ پلانٹس قائم کرنے کا کام جاری ہے۔
وزیر اعلیٰ نے بتایا کہ نانگلی سکراوتی پلانٹ میں ایک سال کے دوران 55 ہزار ٹن گوبر استعمال کیا گیا، جس کے عوض کسانوں کو 3.5 کروڑ روپے ادا کیے گئے۔