راہل گاندھی کا گوا حکومت پر زمین لوٹنے کا الزام

نئی دہلی، 19 اکتوبر (یواین آئی) لوک سبھا میں اپوزیشن رہنما راہل گاندھی نے اتوار کو بی جے پی کی زیر قیادت گوا حکومت پر شدید حملہ کرتے ہوئے وسیع پیمانے پر بدعنوانی، عام لوگوں کی زمین دولت مند صنعت کاروں کو منتقل کرنے اور جمہوری اداروں کو مبینہ طور پر کمزور کرنے کا الزام عائد کیا۔ انہوں نے گوئے رکھون یاترا کے اختتامی مرحلے میں جنوبی گوا کے مارگاؤ میں ایک بڑے جلسے سے خطاب کرتے ہوئے چیف الیکشن کمشنر گیانیش کمار کو بھی ووٹ چوری کے الزامات پر نشانہ بنایا اور کہا کہ کانگریس انتخابی بے ضابطگیوں کو بے نقاب کرنے کی لڑائی جاری رکھے گی۔
راہل گاندھی نے کہا کہ کانگریس آئین کی محافظ ہے اور مبینہ طور پر ووٹ چوری کے ذریعے آئین اور جمہوری ذمہ داری پر حملہ کیا گیا ہے، جسے پارٹی برداشت نہیں کرے گی۔ انہوں نے چیف الیکشن کمشنر گیانیش کمار سے انتخابی بے ضابطگیوں کے الزامات سے نمٹنے کے طریقہ کار پر سوال اٹھاتے ہوئے کہا کہ ان کے خلاف 45 سے زیادہ ہتک عزت کے مقدمات دائر کیے گئے ہیں، لیکن ووٹ چوری کے الزام پر ان کے خلاف کوئی مقدمہ نہیں کیا گیا۔
گوا حکومت پر تنقید کرتے ہوئے کانگریس رہنما نے الزام لگایا کہ عام لوگوں، کسانوں اور غریبوں کی زمین دولت مند صنعت کاروں اور بااثر لوگوں کو منتقل کی جا رہی ہے۔ انہوں نے کہا کہ معاملہ صرف بدعنوانی تک محدود نہیں بلکہ گوا کے مستقبل، قدرتی ماحول، ثقافتی شناخت اور نوجوانوں کے روزگار سے بھی جڑا ہے۔ انہوں نے الزام لگایا کہ ریاست کے نوجوان روزگار کے مواقع کی تلاش میں بیرون ملک جانے پر مجبور ہو رہے ہیں۔
راہل گاندھی نے طلبہ مظاہرین کے ساتھ مبینہ سلوک پر بھی تشویش ظاہر کی اور کہا کہ ہندوستان کبھی عالمی معیار کے تعلیمی نظام کے لیے جانا جاتا تھا، لیکن اب طلبہ کے احتجاج کے دوران مبینہ طور پر پیلٹ گنوں کے استعمال کی بات سامنے آ رہی ہے۔ انہوں نے کہا کہ نوجوانوں کے حقوق، تعلیم اور روزگار کے مسائل کو ریاست کی ترقی میں مرکزی اہمیت دی جانی چاہیے۔
کانگریس کی ‘گوئے رکھون یاترا’ 22 ستمبر کو شروع ہوئی تھی اور پارٹی کے مطابق اس نے گوا کی تمام 40 اسمبلی نشستوں کا احاطہ کیا۔ یاترا میں زمین کے حقوق، ماحولیات کے تحفظ، روزگار اور گوا کی ثقافتی شناخت کے تحفظ کو اہم مسائل کے طور پر اٹھایا گیا۔ اختتامی دن راہل گاندھی نے پارٹی رہنماؤں اور کارکنوں کے ساتھ کالکونڈا سے مارگاؤ تک مارچ میں شرکت کی۔