یورپ کی بد امنی میں روس کا ہاتھ،کریملن نے مضحکہ خیز قرار دے دیا

ماسکو، 19 اکتوبر (یو این آئی) کریملن کے ترجمان دمتری پیسکوف نے یورپ کی بد امنی میں روس کے ملوث ہونے کے الزامات کو مسترد کرتے ہوئے انہیں "مضحکہ خیز” قرار دیا ہے اور کہا ہے کہ اب ان الزامات کو سنجیدگی سے نہیں لیا جاتا۔
پیسکوف نے پیر کے روز ‘زویسدا نیوز سے گفتگو کرتے ہوئے کہا کہ "اب کہیں بھی کوئی ایسے مضحکہ خیز الزامات کو سنجیدگی سے نہیں لیتا، یہاں تک کہ خود یورپ میں بھی نہیں۔”
واضح رہے کہ 17 اکتوبر کو پیرس اور فرانس کے دیگر شہروں میں بڑے پیمانے پر احتجاجی مظاہرے ہوئے، جو کچھ مقامات پر ہنگامہ آرائی میں تبدیل ہو گئے۔
رپورٹ کے مطابق مظاہرین نے بلدیاتی عمارتوں کو آگ لگا دی، دکانوں کو لوٹا اور پولیس اسٹیشنوں پر حملے کیے۔
پیسکوف نے یہ بھی بتایا کہ روسی صدر ولادیمیر پیوٹن نے حکومت میں ردوبدل کے لیے وزیر اعظم میخائل مشسٹن کی تجاویز کی حمایت کی ہے۔
پیسکوف کے مطابق، مشسٹن نے پیر کی صبح پوتن کے ساتھ ایک ملاقات کے دوران یہ تجاویز پیش کیں، تاہم انہوں نے یہ واضح نہیں کیا کہ کون سے حکام اس تبدیلی سے متاثر ہوں گے۔
روس کے آئین کے تحت، مشسٹن منظوری کے لیے متعلقہ نامزدگیاں پارلیمان میں پیش کریں گے۔
جب پیسکوف سے پوچھا گیا کہ کیا ہندوستانی وزیر اعظم نریندر مودی اس سال کے آخر تک یا 2027 میں روس کا دورہ کریں گے تو انہوں نے کہا کہ یہ دورہ ممکنہ طور پر اگلے سال ہوگا۔
روس اور ہندوستان کے درمیان سنہ 2000 کے اسٹریٹجک پارٹنرشپ کے اعلامیے کے تحت دونوں ممالک کے رہنما سالانہ ملاقات کرتے ہیں۔
پیسکوف نے کہا کہ طے شدہ روٹیشن کے تحت مودی کا روس کا اگلا دورہ متوقع ہے۔
پیسکوف نے یہ بھی بتایا کہ پیوٹن کا سالانہ ٹیلی ویژن پر براہِ راست سوال و جواب کا پروگرام اور پریس کانفرنس روایتی طور پر دسمبر کے مہینے کے لیے شیڈول ہے۔