سرینگر؍۱۰؍اکتوبر
شمالی کشمیر کے ضلع بارہمولہ میں سوپور کے ایک جنگلاتی علاقے سے اسلحہ، گولہ بارود، دستی بم اور دھماکہ خیز مواد کا ایک بڑا ذخیرہ برآمد کیا گیا ہے۔ پولیس نے ہفتہ کے روز اس کارروائی کی تفصیلات فراہم کرتے ہوئے اسے دہشت گردی کے خلاف جاری کوششوں میں ایک اہم کامیابی قرار دیا۔
پولیس ترجمان کے مطابق سوپور پولیس کو ملنے والی مخصوص خفیہ اطلاعات کی بنیاد پر ضلع کے سوپور علاقے میں مقام چرہار کے جنگلات میں محاصرے اور تلاشی کی کارروائی شروع کی گئی۔ تلاشی کے دوران اسلحہ، گولہ بارود، دستی بم، دیسی ساختہ دھماکہ خیز آلات (آئی ای ڈی) اور دیگر متعلقہ سامان کا بڑا ذخیرہ برآمد ہوا۔
ترجمان نے بتایا کہ تلاشی کے دوران ایک بڑے پتھر کے نیچے چھپایا گیا نیلے رنگ کا ڈرم اور ایک بیگ ملا۔ مشتبہ دھماکہ خیز مواد کی جانچ اور اسے محفوظ طریقے سے سنبھالنے کے لیے فوری طور پر بم ناکارہ بنانے والے دستے کو موقع پر طلب کیا گیا۔
پولیس کے مطابق برآمد شدہ سامان میں دو خودکار رائفلیں، اے کے۴۷؍اور اے کے۷۶ ، سات میگزین اور گولہ بارود شامل ہیں۔ اس کے علاوہ چار پستول، چار میگزین اور ان کے لیے گولہ بارود بھی ضبط کیا گیا۔
دیگر برآمد شدہ اشیا میں پانچ گولوں کے ساتھ ایک ملٹی گرینیڈ لانچر (ایم جی ایل)، 11 دستی بم، ریموٹ کنٹرول کے ساتھ تین دیسی ساختہ دھماکہ خیز آلات، آٹھ ڈیٹونیٹر اور دو ٹائمر شامل ہیں۔
ترجمان نے مزید بتایا کہ تلاشی کے دوران وائی ایس ایم ایس سیٹ، پرائما کورڈز، تاریں، بیٹری سیل، آئی ای ڈی سے متعلقہ پرزے اور دیگر متفرق لوازمات بھی برآمد کیے گئے۔
پولیس کے مطابق تمام برآمد شدہ مواد کو ضروری حفاظتی اقدامات اور قانونی ضابطوں کی پابندی کرتے ہوئے اپنی تحویل میں لے لیا گیا ہے۔
اس سلسلے میں پولیس اسٹیشن بومئی میں ایک ایف آئی آر نمبر درج کی گئی ہے۔ مقدمہ غیر قانونی سرگرمیاں (روک تھام) قانون (یو اے پی اے) کی متعلقہ دفعات اور ایکسپلوسیو سبسٹینسز ایکٹ کی دفعہ۵ کے تحت درج کیا گیا ہے۔
پولیس ترجمان کے مطابق برآمد شدہ مواد کے ماخذ اور ملکیت کا پتا لگانے، اسے چھپانے میں ملوث افراد کی شناخت کرنے اور ممکنہ دہشت گرد روابط کا سراغ لگانے کے لیے مزید تحقیقات جاری ہیں۔
ترجمان نے کہا کہ تحقیقات کے دوران اسلحہ اور دھماکہ خیز مواد چھپانے کے حالات کا بھی پتا لگایا جائے گا اور اس کارروائی میں ملوث تمام افراد کی شناخت کرنے کی کوشش کی جائے گی۔ پولیس نے اس برآمدگی کو سوپور پولیس کی دہشت گردی کے خلاف جاری کارروائیوں میں ایک اہم کامیابی قرار دیا۔
۔۔۔۔۔۔(ایجنسیاں)
