راجوری؍۹؍ اکتوبر
جموں کشمیر کے ضلع راجوری میں جمعہ کی شام مسافر گاڑی کو پیش آئے ایک سڑک حادثے میں دو افراد ہلاک جبکہ پانچ دیگر شدید زخمی ہوگئے۔
حکام کے مطابق حادثہ جمعہ کی شام تقریباً۶بجے مغلا تریاٹھ کے بدھوگ علاقے میں پیش آیا، جہاں ایک مسافر گاڑی سڑک سے پھسل گئی۔ حادثے کے نتیجے میں دو افراد کی موقع پر ہی موت ہوگئی جبکہ پانچ دیگر شدید زخمی ہوگئے۔
حادثے کی اطلاع ملتے ہی مقامی لوگوں اور پولیس نے جائے وقوعہ پر پہنچ کر امدادی کارروائیاں شروع کیں اور زخمیوں کو علاج و معالجے کے لیے قریبی اسپتال منتقل کیا۔ زخمیوں میں سے بعض کی حالت تشویشناک بتائی جاتی ہے۔
پولیس نے واقعے کا نوٹس لیتے ہوئے مزید تحقیقات شروع کردی ہیں۔
اس دوران وزیر اعلیٰ عمر عبداللہ نے سڑک حادثے پر گہرے دکھ اور افسوس کا اظہار کیا ہے، جس میں دو افراد کی موت ہوگئی جبکہ کئی دیگر شدید زخمی ہوئے۔
حادثے میں جان بحق ہونے والوں کے اہل خانہ کے ساتھ دلی تعزیت کا اظہار کرتے ہوئے وزیر اعلیٰ نے اس سانحے میں اپنے عزیزوں کو کھونے والے خاندانوں کے ساتھ ہمدردی ظاہر کی۔ انہوں نے ضلع انتظامیہ کو ہدایت دی کہ امدادی کارروائیوں میں تیزی لائی جائے اور تمام زخمیوں کو بہترین ممکنہ طبی علاج فراہم کرنے کو یقینی بنایا جائے۔
۔۔۔۔۔۔(ایجنسیاں )
