وکست بھارت کی تعمیر میں اپنا تعاون دیں نوجوان: وجیندر

نئی دہلی، 08 ستمبر (یو این آئی) دہلی اسمبلی کے اسپیکر وجیندر گپتا نے نوجوانوں سے کہا ہے کہ وہ سیاست کو دور سے نہ دیکھیں، آگے آئیں، اس میں حصہ لیں اور وکست بھارت کی تعمیر میں اپنا تعاون دیں۔
گپتا نے منگل کے روز دہلی اسمبلی کے یوتھ کنیکٹ پروگرام کے تحت دہلی یونیورسٹی کے مختلف کالجوں کے طلباء کے ساتھ گفتگو کرتے ہوئے کہا "سیاست کو دور سے نہ دیکھیں؛ آگے آئیں، اس میں حصہ لیں اور وکست بھارت کی تعمیر میں اپنا تعاون دیں”۔ جمہوریت میں نوجوانوں کی شرکت کی اہمیت پر زور دیتے ہوئے گپتا نے طلباء سے صرف سیاست اور جمہوری عمل کے ناظرین بنے رہنے کے بجائے عوامی زندگی، گڈ گورننس اور ملک کی تعمیر میں سرگرمی سے تعاون دینے کی اپیل کی۔ راجدھانی کالج، شیاما پرساد مکھرجی کالج، لاء سینٹر اور شیواجی کالج کے طلباء نے یوتھ کنیکٹ پروگرام کے تحت دہلی اسمبلی کا دورہ کیا اور اسمبلی اسپیکر وجیندر گپتا کے ساتھ پارلیمانی کارروائی، جمہوری شرکت نیز ایوان کی کارروائی کو خوش اسلوبی سے چلانے میں اسمبلی اسپیکر کے کردار سمیت مختلف موضوعات پر گفتگو کی۔
ایوان کی کارروائی میں مزید شفافیت اور نظم و ضبط کو یقینی بنانے کے لیے کیے گئے اقدامات کی معلومات دیتے ہوئے گپتا نے اسمبلی ایوان میں نصب ڈسپلے اسکرین پر وقت کو ظاہر کرنے والے ٹائمر کے نظام کا بھی ذکر کیا۔ انہوں نے بتایا کہ ہر رکن کو دیے گئے بولنے کے وقت کو اسکرین پر واضح طور پر ظاہر کیا جاتا ہے، جس سے اراکین کو اپنے لیے مقرر کردہ وقت کی معلومات رہتی ہے اور ایوان کی کارروائی کو منظم اور وقت کی پابندی کے ساتھ چلانے میں بھی مدد ملتی ہے۔ طلباء نے دہلی اسمبلی کے تاریخی احاطے کا دورہ کیا اور اس کے شاندار تعمیراتی اور ادارہ جاتی ورثے کے بارے میں معلومات حاصل کیں۔ طلباء کو اس عمارت کے اس وقت کی مرکزی قانون ساز اسمبلی سے جڑے تاریخی تعلقات اور اس سے جڑی اہم پارلیمانی شخصیات و تاریخی واقعات کے بارے میں بھی آگاہ کیا گیا۔
طلباء کو اسمبلی کے سووینئر کافی ٹیبل بک "ایک شتابدی یاترا” سے بھی متعارف کرایا گیا، جس میں اسمبلی کے تاریخی سفر اور شاندار ورثے کو محفوظ کیا گیا ہے۔ طلباء نے مرکزی اسمبلی ایوان کا بھی دورہ کیا، جہاں انہوں نے اس جگہ کو خود دیکھا جہاں ایوان کی قانون سازی کی بحثیں اور کارروائیاں چلائی جاتی ہیں اور انہیں ایوان کے کام کاج کو براہ راست سمجھنے کا موقع ملا۔ گپتا نے انہیں جمہوری اداروں سے مسلسل جڑے رہنے اور عوامی مفاد کے موضوعات کی ایک بیدار اور باخبر سمجھ پیدا کرنے کے لیے ترغیب دی۔ انہوں نے نوجوانوں سے جمہوری زندگی میں سرگرمی سے حصہ لینے اور اپنے علم، افکار اور توانائی کے ذریعے جمہوری اداروں کو مضبوط کرنے اور وکست بھارت کی تعمیر میں تعاون دینے کی اپیل کی۔