وی وی ایس لکشمن ایشیائی کھیلوں میں ہندوستانی مرد کرکٹ ٹیم کے کوچ مقرر

ممبئی، 3 ستمبر (یواین آئی) ہندوستان کے سابق بلے باز وی وی ایس لکشمن جاپان کے آئیچی-ناگویا میں 19 ستمبر سے 4 اکتوبر تک منعقد ہونے والے ایشیائی کھیل 2026 میں ہندوستانی مرد کرکٹ ٹیم کے ہیڈ کوچ کی ذمہ داری سنبھالیں گے۔ 10 ٹیموں پر مشتمل مردوں کا کرکٹ ٹورنامنٹ 24 ستمبر سے 3 اکتوبر تک کھیلا جائے گا۔
مستقل ہیڈ کوچ گوتم گمبھیر ایشیائی کھیلوں کے لیے ہندوستانی ٹیم کے ساتھ جاپان کا سفر نہیں کریں گے، کیونکہ وہ 27 ستمبر سے ویسٹ انڈیز کے خلاف گھریلو میدان پر ہونے والی تین میچوں کی ون ڈے سیریز کے لیے ہندوستانی ٹیم کے ساتھ رہیں گے۔ سابق کھلاڑی سنیل جوشی، ریشیکیش کانیتکر اور سبدیپ گھوش معاون اسٹاف میں شامل ہوں گے، جبکہ معروف فزندر ٹیم لیڈر کی ذمہ داری سنبھالیں گے۔
ایشیائی کھیلوں کے لیے ہندوستانی خواتین کی کرکٹ ٹیم کے کوچنگ سیٹ اپ میں مستقل کوچ امول مزومدار اور آویشکار سالوی شامل ہوں گے۔
شریاس ایئر کو ہندوستان کا ٹی-20 کپتان جبکہ تلک ورما کو نائب کپتان مقرر کیا گیا ہے۔ ہندوستانی مرد ٹیم کی جانب سے ڈیبیو کرنے والے کم عمر ترین کھلاڑی نوعمر باصلاحیت ویبھَو سوریہ ونشی اور تیز گیندباز جسپریت بمراہ کو بھی 15 رکنی ٹیم میں شامل کیا گیا ہے۔
وی وی ایس لکشمن اس سے قبل چین میں منعقدہ ہانگژو 2023 ایشیائی کھیلوں میں ہندوستان کو طلائی تمغہ دلا چکے ہیں۔ وہ آسٹریلیا، جنوبی افریقہ اور آئرلینڈ کے خلاف متعدد دو طرفہ ٹی-20 سیریز میں بھی ہندوستان کے ہیڈ کوچ کی ذمہ داری نبھا چکے ہیں، جن میں رواں سال کے آغاز میں زمبابوے کے خلاف سیریز بھی شامل ہے۔
ہندوستان، پاکستان، بنگلہ دیش اور سری لنکا کو سیڈ ٹیموں کا درجہ حاصل ہے اور یہ ٹیمیں اپنی مہم کا آغاز براہ راست کوارٹر فائنل سے کریں گی۔ افغانستان، جاپان اور نیپال گروپ اے میں، جبکہ ہانگ کانگ، چین، ملائیشیا اور عمان گروپ بی میں شامل ہیں۔ ہر گروپ کی سرفہرست دو ٹیمیں کوارٹر فائنل میں پہنچیں گی۔
کرکٹ چوتھی مرتبہ ایشیائی کھیلوں میں شامل کیا جائے گا۔ ہندوستان نے اس کھیل کو شامل کیے جانے والے پہلے دو ایڈیشن میں حصہ نہیں لیا تھا، جبکہ اس بار وہ دفاعی چیمپئن کی حیثیت سے ٹورنامنٹ میں اترے گا۔