نامیبیا نے جنوبی افریقہ کو 18 رنز سے شکست دے کر شاندار آغاز کیا

ونڈہوک، 29 اگست (یو این آئی) جان فرائلنک کی شاندار نصف سنچری اور جے جے اسمٹ و روبن ٹرمپلمین کی عمدہ گیندبازی کی بدولت نامیبیا نے گھریلو سہ ملکی ٹی-20 سیریز کے پہلے میچ میں جنوبی افریقہ کو 18 رنز سے شکست دے کر یادگار آغاز کیا۔
پہلے بیٹنگ کرتے ہوئے نامیبیا نے مقررہ 20 اوور میں 9 وکٹ پر 163 رنز بنائے، جس میں اوپنر جان فرائلنک نے 38 گیندوں پر 60 رنز کی شاندار اننگز کھیلی۔
جواب میں جنوبی افریقہ نے پاور پلے کے دوران ہی دونوں اوپنرز کے وکٹ گنوا دیے۔ ڈیوالڈ بریوس نے 50 گیندوں پر 75 رنز کی جدوجہد کی، جس میں چار چوکے اور پانچ چھکے شامل تھے، لیکن وہ ٹیم کو فتح نہ دلا سکے۔ جے جے اسمٹ نے 31 رنز دے کر تین جبکہ روبن ٹرمپلمین نے 24 رنز کے عوض تین وکٹ حاصل کیے۔
یہ دونوں ٹیموں کے درمیان بین الاقوامی ٹی-20 کی دوسری ملاقات تھی اور دونوں مرتبہ نامیبیا نے جنوبی افریقہ کو شکست دی۔ یہ کامیابی نامیبیا کے لیے خاصی اہم ہے، جو جنوبی افریقہ اور زمبابوے کے ساتھ مل کر آئندہ سال آئی سی سی مردوں کے کرکٹ ورلڈ کپ کی میزبانی کرے گا۔
کپتان گیرہارڈ ایراسمس نے کہا کہ یہ فتح ثابت کرتی ہے کہ ان کی ٹیم اس سطح پر مسلسل اچھا مظاہرہ کرتے ہوئے بہترین ٹیموں کا مقابلہ کر سکتی ہے۔ ان کا کہنا تھا کہ ٹیم کا مقصد اب سہ ملکی سیریز کے فائنل میں جگہ بنانا ہے، جبکہ جنوبی افریقہ کا اگلا مقابلہ ونڈہوک میں زمبابوے سے ہوگا۔