ڈی آر ڈی او نے لداخ میں انتہائی اونچائی پرملک میں تیار کامبیٹ پیراشوٹ کا کامیاب تجربہ کیا

نئی دہلی، 26 اگست (یو این آئی) دفاعی تحقیق و ترقی کی تنظیم (ڈی آر ڈی او) نے لداخ کے لیہہ ضلع میں واقع نیوما-مُدھ ڈراپ زون میں ملک میں تیار ملٹری کامبیٹ پیراشوٹ سسٹم (ایم سی پی ایس) کا انتہائی اونچائی پر کامیاب تجربہ کیا ہے۔ ڈی آر ڈی او نے بدھ کے روز سوشل میڈیا پر ایک پوسٹ میں کہا کہ اسے آگرہ میں واقع ایریل ڈیلیوری ریسرچ اینڈ ڈیولپمنٹ اسٹیبلشمنٹ (اے ڈی آر ڈی ای) نے ڈیزائن اور تیار کیا ہے۔
اس سسٹم کے تجربے کے دوران اے ڈی آر ڈی ای کے ٹیسٹ جمپرز ونگ کمانڈر راہل جھا، چیف ٹیسٹ جمپر، ایم ڈبلیو او آر جے سنگھ، وی ایم (جی)، ایم ڈبلیو او وویک تیواری نے سطحِ سمندر سے 22,000 فٹ کی اونچائی سے چھلانگ لگائی، جہاں درجۂ حرارت منفی 15 ڈگری سیلسیس تھا اور ایم سی پی ایس نیز دیگر تمام ذیلی سسٹمز، جن میں دیسی پیرا کمپیوٹر، آکسیجن سسٹم اور جمپ سوٹ شامل تھے، کا استعمال کیا گیا۔ پیراشوٹ کو 20,000 فٹ کی اونچائی پر کھولا گیا، جس کے بعد 13,700 فٹ پر محفوظ لینڈنگ ہوئی۔
ڈی آر ڈی او نے کہا ہے کہ اس کامیاب تجربے نے انتہائی اونچائی والے حالات میں ایم سی پی ایس کی افادیت، بھروسے مندی اور اسٹریٹجک افادیت کو ظاہر کیا، جس سے اہم دفاعی ٹیکنالوجیز میں خود کفالت کے تئیں ہندستان کے عزم کو مزید مضبوطی ملی۔