سری نگر؍۲۶؍اگست
جنوبی کشمیر کے ضلع کولگام میں مشترکہ محاصرے اور تلاشی کی کارروائی کے دوران سکیورٹی فورسز نے پانچ دہشت گرد معاونین کو اسلحہ اور گولہ بارود سمیت گرفتار کرلیا۔
حکام نے بدھ کو بتایا کہ جموں و کشمیر پولیس کی خفیہ اطلاع کی بنیاد پر۹ راشٹریہ رائفلز، کولگام پولیس اور۱۸ بٹالین سی آر پی ایف نے بگام آرچرڈ کے عمومی علاقے میں مشترکہ محاصرے اور تلاشی کی کارروائی شروع کی۔
حکام کے مطابق تلاشی کے دوران پانچ دہشت گرد معاونین کو گرفتار کیا گیا۔
گرفتار افراد کی شناخت فرقان احمد وانی(۲۲ ) ولد محمد یونس وانی ساکن بگام، صہیب احمد پالا(۲۰)ولد محمد پالا ساکن بگام، سلمان عباس لون(۲۰)ولد محمد عباس لون ساکن بگام، نداش احمد ریشی(۲۲)ولد گل محمد ریشی ساکن نانی بگ اور فیصل اکبر(۳۰)ولد محمد اکبر ڈار ساکن ریڈونی پائیں کے طور پر ہوئی ہے۔
تلاشی کے دوران سکیورٹی فورسز نے۹؍ایم ایم کی۴پستولیں‘۴پستول میگزین‘۹؍ ایم ایم کے۲۲ راؤنڈ اور۲ ہینڈ گرینیڈ برآمد کیے۔
حکام نے بتایا کہ معاملے کی مزید تحقیقات شروع کردی گئی ہے۔
۔۔۔۔۔
ایجنسیاں
