پرتیتی اور میانک خطاب کے قریب پہنچے

ممبئی، 25 اگست (یو این آئی) ٹاپ سیڈ ڈبلیو ایف ایم پرتیتی بورڈولوئی اور جی ایم-الیکٹ میانک چکرورتی نے ممبئی کے آئی ٹی سی مراٹھا شیراٹن میں جاری ایشین جونیئر کلاسیکل شطرنج چیمپئن شپ کے آٹھویں اور آخری سے قبل راؤنڈ میں کامیابی حاصل کرکے خطاب کی جانب ایک اور قدم بڑھا دیا ہے۔
پرتیتی نے ایف ایم پریشیتا گپتا کو شکست دے کر اپنا اسکور 7/8 کرلیا اور اپنی برتری ایک پوائنٹ تک پہنچا دی۔ ان کی قریبی حریف ترکمانستان کی ڈبلیو سی ایم ایس لیلیٰ کا ڈبلیو سی ایم دکشیتا کماوت کے ساتھ مقابلہ ڈرا رہا اور وہ 6 پوائنٹس پر پہنچ گئیں۔ قازقستان کی ڈبلیو ایف ایم ماریا خولیافکو اور ڈبلیو سی ایم شراوی شری بھیمراسیٹی نے بھی اہم کامیابیاں حاصل کرکے 6 پوائنٹس کرلیے۔
اوپن چیمپئن شپ میں میانک چکرورتی نے دکش گوئل کو شکست دے کر 7/8 اسکور کے ساتھ اپنی پوزیشن مزید مضبوط کرلی۔ ان کے قریب ترین حریف روس کے آئی ایم آرتیم پنگن نے آئی ایم وگنیش ادویت ویمولا کو شکست دے کر 6.5 پوائنٹس حاصل کرلیے۔
ایف ایم شرنارتھی ویرش کا آئی ایم اپوروا کامبلے کے ساتھ مقابلہ ڈرا رہا اور وہ 6 پوائنٹس پر پہنچ گئے، جبکہ ایف ایم مادھویندر پرتاپ شرما نے ترکمانستان کے سی ایم احمد کو ہراکر 6 پوائنٹس حاصل کیے۔
اب صرف ایک راؤنڈ باقی ہے۔ اوپن چیمپئن شپ میں میانک کو پنگن پر آدھے پوائنٹ کی برتری حاصل ہے، جس کے باعث فیصلہ کن راؤنڈ میں مقابلہ دلچسپ ہونے کی توقع ہے۔ دوسری جانب پرتیتی اپنے قریبی حریفوں سے ایک پوائنٹ آگے ہیں اور دونوں ٹائٹلز کی دوڑ آخری اور فیصلہ کن راؤنڈ میں داخل ہوگئی ہے۔