روسی افواج کے حملے میں یوکرین میں 9 افراد ہلاک، زیلنسکی کو انتخابات کے معاملے پر دباؤ کا سامنا

کیف، 20 اگست (یو این آئی) روسی افواج نے یوکرین کے دارالحکومت کیف اور سرحدی علاقے پر بیلسٹک میزائل حملے کیے، جن میں کم از کم 9 افراد ہلاک اور 33 دیگر زخمی ہو گئے۔
حکام کے مطابق یہ حملے ایسے وقت میں ہوئے ہیں جب صدر ولودیمیر زیلنسکی کو ملک میں جاری سیاسی بحران اور اندرونی سیاسی دباؤ کا سامنا ہے۔ یوکرین کے خبر رساں ادارے کیف انڈیپنڈنٹ کے مطابق جمعرات کی صبح کیف کے مختلف اضلاع میں دھماکوں کی آوازیں سنائی دیں، عمارتیں لرز اٹھیں اور گاڑیوں کے الارم بجنے لگے۔ حملوں نے سویاتو شینسکی، سولیومینسکی اور شیفچینکیوسکی اضلاع کو نشانہ بنایا۔
کیف کے میئر وٹالی کلیچکو نے ٹیلی گرام پر بتایا کہ سولیومینسکی ضلع میں حملے کے بعد ایک نو منزلہ رہائشی عمارت منہدم ہوگئی اور اس میں آگ لگ گئی۔ انہوں نے کہا کہ ضلع میں بچوں کا ایک اسپتال بھی متاثر ہوا، اس کی کھڑکیاں ٹوٹ گئیں جبکہ عمارت کے احاطے میں گاڑیوں میں آگ لگ گئی۔ انہوں نے مزید کہا کہ ایک دوسری رہائشی عمارت میں "لوگ پھنسے ہوئے ہیں”، جبکہ سویاتو شینسکی اور سولیومینسکی اضلاع کے بعض حصے بجلی سے محروم ہو گئے ہیں۔
یوکرین کی ایمرجنسی سروسز نے کہا کہ دارالحکومت پر ہونے والے "بڑے پیمانے کے حملے” میں کم از کم 8 افراد ہلاک اور 33 زخمی ہوئے۔ رہائشی عمارتوں اور گوداموں میں آگ بھڑک اٹھی۔ سروسز کے مطابق امدادی کارکن جائے وقوعہ پر موجود ہیں اور منہدم عمارتوں کے ملبے سے کم از کم دو افراد کو زندہ نکالا جا چکا ہے۔ کیف کے وسیع تر علاقے کے بروواری ضلع میں ہونے والے ایک حملے میں ایک شخص ہلاک اور ایک زخمی ہوا۔
کیف ریجن کے گورنر تیمور تکاچینکو نے بتایا کہ ایک صنعتی تنصیب کو نقصان پہنچا اور آگ بجھانے کے لیے متعلقہ اداروں کی ٹیمیں موقع پر پہنچ گئیں۔ یوکرین کی فضائیہ نے اس سے قبل خبردار کیا تھا کہ کیف ریجن کے کاغارلیک گاؤں کے قریب روسی کالیبر میزائل موجود ہیں جو دارالحکومت کی جانب بڑھ رہے ہیں۔ پڑوسی نیٹو ممالک میں بھی سکیورٹی اقدامات ان حملوں کے بعد پڑوسی نیٹو رکن ممالک نے بھی سکیورٹی اقدامات کیے