برکس ماحولیاتی گروپ کی میٹنگ میں چار ترجیحات پر اتفاق

نئی دہلی، 17 اگست (یو این آئی) ہندوستان کی صدارت میں برکس ماحولیاتی ورکنگ گروپ اور ماحولیاتی تبدیلی و پائیدار ترقی پر پیر کے روز رابطہ گروپ کے سینئر حکام کی میٹنگ ہوئی۔ اس میں برازیل، چین، مصر، ایتھوپیا، انڈونیشیا، ایران، روس، جنوبی افریقہ اور متحدہ عرب امارات کے مندوبین نے حصہ لیا۔
وزارتِ ماحولیات، جنگلات و ماحولیاتی تبدیلی کے سکریٹری تنمے کمار کی صدارت میں پیر کے روز یہاں بھارت منڈپم میں منعقدہ میٹنگ میں چار اہم شعبوں—پائیدار طرزِ زندگی کو فروغ دینا، جنگل کاری و جنگلاتی آگ کا نظم و نسق اور تباہی کا انسداد، گردشی معیشت اور ماحولیاتی موافقت میں تعاون بڑھانے پر تبادلہ خیال کیا گیا۔
مسٹر کمار نے کہا کہ گزشتہ دو دہائیوں میں برکس اقتصادی مکالمے کے پلیٹ فارم سے آگے بڑھ کر آلودگی، حیاتیاتی تنوع کے نقصان اور عالمی درجہ حرارت میں اضافے جیسے سنگین ماحولیاتی چیلنجوں سے نمٹنے کا بااثر پلیٹ فارم بن گیا ہے جس میں پائیدار ترقی، ماحولیاتی موافقت، وسائل کی کارکردگی، گردشی معیشت اور ماحولیاتی گورننس کے شعبے میں تعاون کو مزید مضبوط کرنے پر زور دیا گیا ہے۔
انہوں نے کہا کہ ہندوستان کی برکس صدارت وزیر اعظم نریندر مودی کے انسانیت کو ترجیح دینے والے عوام پرمرکوز عالمی تعاون کے نقطہ نظر سے متاثر ہے۔ اس سال کا تھیم ‘مضبوطی، جدت طرازی، تعاون اور پائیدار ترقی کے لیے تعمیر’ اسی جذبے کی عکاسی کرتا ہے۔ میٹنگ میں بتایا گیا کہ ہندوستان کی صدارت شروع ہونے کے بعد رکن ممالک کے درمیان 21 ورچوئل موضوعاتی و مذاکراتی میٹنگیں، 10 دوطرفہ مشاورتیں، دو موضوعاتی ڈائیلاگ اور دو ٹیکنیکل ویبینار منعقد کیے جا چکے ہیں۔
برکس رکن ممالک کے وفود نے ہندوستان کی قیادت کی سراہتے ہوئے کہا کہ باہمی احترام، اعتماد اور اتفاقِ رائے پر مبنی ماحول میں ترجیحی مسائل پر بات چیت آگے بڑھانے میں ہندوستان کا کردار اہم رہا ہے۔ برکس وزرائے ماحولیات کی 12 ویں میٹنگ منگل کے روز نئی دہلی میں ہوگی۔