رچناتمک کانگریس کے قومی اجلاس میں عوام سے جڑے مسائل پر کھلی بات چیت ہوگی: سندیپ دکشت

نئی دہلی، 11 اگست (یو این آئی) کانگریس کی معاون تنظیم رچناتمک کانگریس کا دو روزہ قومی اجلاس یہاں 12 اور 13 اگست کو منعقد ہوگا جس میں تعلیم، سماجی انصاف، معاشی انصاف، بے روزگاری، نقل مکانی اور ماحولیات سمیت عوام سے جڑے مسائل پر بحث کی جائے گی۔
رچناتمک کانگریس کے صدر سندیپ دکشت نے منگل کو یہاں پارٹی ہیڈکوارٹر میں پریس کانفرنس کے دوران یہ معلومات دیتے ہوئے بتایا کہ اجلاس کے پہلے دن تقریباً 350 سے 400 اور دوسرے دن تقریباً 550 سے 600 مندوبین شرکت کریں گے۔ پہلے دن تنظیم کے کام کاج اور حکمت عملی پر بحث ہوگی نیز مختلف مسائل پر زمینی سطح پر کام کرنے والے لوگوں کے تجربات اور تجاویز لی جائیں گی۔ انہوں نے کہا کہ یہ اجلاس عام کانفرنسوں سے مختلف ہوگا۔ اس میں ماہرین کے تقاریر کے بجائے زمین پر کام کرنے والے لوگوں کے تجربے کو اہمیت دی جائے گی۔ پہلے دن مختلف موضوعات پر چار سیشن ہوں گے اور اس کے بعد رچناتمک کانگریس کی حکمت عملی پر بحث ہوگی۔
مسٹر دکشت نے کہا "دونوں دن کھلے سیشن ہوں گے، کیونکہ یہ لوگوں کا پلیٹ فارم ہے۔ اس میں لوگ سوال پوچھ سکیں گے اور اپنی بات رکھ سکیں گے۔ دوسرے دن پہلے دن کی بحث کے جائزے کے بعد کانگریس صدر ملکارجن کھرگے اپنے خیالات پیش کریں گے اور لوگوں کے ساتھ بات چیت کریں گے۔ لوک سبھا میں اپوزیشن لیڈر راہل گاندھی بھی پروگرام میں شامل ہو کر لوگوں کے ساتھ کھلی بات چیت کریں گے۔”
رچناتمک کانگریس کا مقصد بتاتے ہوئے انہوں نے کہا کہ یہ کانگریس کی اقدار سے متاثر معاون تنظیم ہے جس کا مقصد سماجی، معاشی اور سیاسی مسائل نیز عوام سے جڑے موضوعات پر کام کرنے والے لوگوں سے بات چیت اور تعاون کرنا ہے۔ انہوں نے واضح کیا کہ یہ کانگریس کا دانشورانہ سیل یا تھنک ٹینک نہیں ہے۔