کنیا کماری کے ماہی گیر گاؤں کے لیے وسنت نے 1000 کروڑ روپے کے خصوصی پیکیج کا مطالبہ کیا

نئی دہلی، 11 اگست (یواین آئی) کنیا کماری سے کانگریس کے رکنِ پارلیمنٹ وجے وسنت نے لوک سبھا میں رول 197 کے تحت نوٹس دے کر کنیا کماری ضلع کے ماہی گیر گاووں کی مجموعی ترقی اور قدرتی آفات سے نمٹنے کی صلاحیت کو مضبوط بنانے کے لیے مرکزی حکومت سے 1000 کروڑ روپے کے خصوصی پیکیج کا مطالبہ کیا ہے۔
رکنِ پارلیمنٹ نے کہا کہ کنیا کماری کا طویل اور حساس سمندری ساحل بڑی تعداد میں مچھوارا گاؤوں اور سمندر پر منحصر ہزاروں خاندانوں کا مسکن ہے۔ ماہی گیر ملک کی غذائی تحفظ اور معیشت میں اہم کردار ادا کرتے ہیں، لیکن وہ سمندری طوفانوں، طوفانی لہروں، بلند سمندری لہروں اور ساحلی کٹاؤ کے بڑھتے ہوئے خطرات کا سامنا کر رہے ہیں۔ انہوں نے پیکیج میں گرائن، سی وال سمیت ساحلی تحفظ کے اقدامات، ماہی گیر گاووں کو بندرگاہوں، لینڈنگ سینٹرز اور منڈیوں سے جوڑنے والی ہر موسم میں قابلِ استعمال سڑکوں کی تعمیر کا مطالبہ کیا۔ اس کے ساتھ ہی انہوں نے پینے کے صاف پانی، قدرتی آفات سے محفوظ مکانات، سائیکلون شیلٹرز، نکاسی کے راستوں اور ہنگامی سہولیات کی فراہمی کی بھی تجویز دی۔
مسٹر وسنت نے کوسٹ گارڈ، بحریہ اور ریاستی انتظامیہ کے باہمی تعاون سے فوری بچاؤ کی کارروائیوں کے لیے ہیلی پیڈ، کولڈ اسٹوریج، برف سازی کے مراکز اور نقصان پہنچنے والے ماہی گیری کے بنیادی ڈھانچے کی فوری بحالی کے لیے ایک علیحدہ ڈزاسٹر ریکنسٹرکشن فنڈ کا بھی مطالبہ کیا۔ انہوں نے مرکزی حکومت سے اس پیکیج کو فوری طور پر منظور کرنے کی اپیل کی۔