دہلی لکشمی یوجنا کی مخالفت پر بی جے پی نے عآپ کے اراکینِ اسمبلی کے مکانات اور دفاتر کے باہر کیا مظاہرہ

نئی دہلی، 10 اگست ( یواین آئی ) دہلی اسمبلی میں دہلی لکشمی یوجنا کی مخالفت کرنے پر بھارتیہ جنتا پارٹی (بی جے پی) نے پیر کے روز عام آدمی پارٹی (عآپ) کے اراکینِ اسمبلی (ایم ایل اے) کے مکانات اور دفاتر پر مظاہرہ کیا۔
ریاستی بی جے پی صدر ہرش ملہوترا کی قیادت میں بی جے پی رہنماؤں اور کارکنوں نے عآپ کے تمام 22 اراکینِ اسمبلی کے مکانات اور دفاتر پر مظاہرہ کیا۔ اسمبلی میں اپوزیشن لیڈر اور کالکاجی سے رکنِ اسمبلی محترمہ آتشی کی رہائش گاہ پر دہلی بی جے پی جنرل سکریٹری محترمہ یوگیتا سنگھ، وزیر نریش وششٹھ اور سابق رکنِ پارلیمنٹ مسٹر رمیش بدھوڑی کی قیادت میں بی جے پی کارکنوں نے مظاہرہ کیا۔
اس دوران بی جے پی رہنماؤں نے محترمہ آتشی پر اسمبلی کی کارروائی چھوڑ کر گوا گھومنے کا الزام لگایا اور کہا کہ یہ افسوسناک ہے کہ خاتون ہونے کے باوجود انہوں نے اپنی پارٹی کو دہلی لکشمی یوجنا کی مخالفت کرنے کی ہدایت دی۔ اسی طرح دارالحکومت کے دیگر حصوں میں بی جے پی کارکنوں نے عآپ’کے اراکینِ اسمبلی کے مکانات اور دفاتر کے باہر مظاہرہ کیا اور ان کے خلاف نعرے بازی کی۔