سندھی سماج میں چالیہا مہوتسو کی دھوم، نئی نسل کو سندھی سماج کے مذہبی اور ثقافتی ورثے سے جوڑنے کی کوشش

نئی دہلی، 10 اگست (یو این آئی) بھگوان شری جھولے لال جی کے نعروں اور بھکتی گیتوں سے ان دنوں سندھی سماج کا ماحول بھکتی سے معمور ہے ملک ہی نہیں بلکہ دنیا کے مختلف حصوں میں آباد سندھی سماج کے لوگ اپنے آرادھیہ دیو بھگوان شری جھولے لال جی کا ‘چالیہا مہوتسو’ عقیدت اور جوش و خروش کے ساتھ منا رہے ہیں دہلی میں سندھی سماج کی اہم تنظیم ‘سندھو سماج دہلی’ کی جانب سے بھی بھگوان شری جھولے لال جی کے چالیہا مہوتسو کا اہتمام 16 جولائی تا 25 اگست 2026 کیا جا رہا ہے اس دوران بڑی تعداد میں سماج کے لوگ مذہبی پروگراموں میں حصہ لے کر بھگوان جھولے لال جی کی آرادھنا کر رہے ہیں۔
سندھو سماج دہلی کے جنرل سکریٹری نریش بیلانی نے بتایا کہ چالیہا مہوتسو سندھی سماج کے مذہبی عقیدے اور صدیوں پرانی روایتوں کا ایک اہم حصہ ہے۔ بھگوان شری جھولے لال جی کو سندھی سماج اپنا اشٹ دیوتا (خاص معبود) مانتا ہے اور چالیہا کے دوران عقیدت مند مکمل عقیدت کے ساتھ پوجا ارچنا، بھجن کیرتن اور دیگر مذہبی سرگرمیوں میں حصہ لیتے ہیں۔ انہوں نے کہا کہ چالہا صرف ایک مذہبی تقریب نہیں بلکہ سندھی سماج کی اتحاد، ثقافت اور روایتوں کو زندہ رکھنے والا تہوار بھی ہے۔ ملک و بیرون ملک میں رہنے والے سندھی خاندان اس موقع پر متحد ہو کر بھگوان جھولے لال جی کا یادگار روپ یاد کرتے ہیں اور خاندان و سماج کی خوشحالی اور انسانی فلاح و بہبود کی دعا کرتے ہیں۔
مسٹر بیلانی کے مطابق چالیہا مہوتسو کے ذریعے نئی نسل کو بھی سندھی سماج کے مذہبی اور ثقافتی ورثے سے جوڑنے کی کوشش کی جا رہی ہے۔ مذہبی تقریبات میں نوجوانوں اور بچوں کی شرکت سے سماج کی روایتوں کو آگے بڑھانے کا پیغام مل رہا ہے۔ انہوں نے کہا کہ بھگوان شری جھولے لال جی کا پیغام محبت، بھائی چارے، ہم آہنگی، خدمت اور انسانیت کا پیغام ہے۔ چالیہا مہوتسو اسی جذبے کو سماج میں مضبوط کرنے کا موقع فراہم کرتا ہے۔ سندھو سماج دہلی کے اس اہتمام کو لے کر سماج کے لوگوں میں کافی جوش و خروش دیکھا جا رہا ہے۔ چالیہا مہوتسو کے دوران عقیدت مند بھگوان شری جھولے لال جی کے درشن اور پوجا ارچنا کر کے مذہبی ماحول میں اپنی عقیدت کا اظہار کر رہے ہیں۔