سپریم کورٹ نے امبانی کی حفاظت جاری رکھنے کی اجازت دی

نئی دہلی// سپریم کورٹ نے جمعہ کو ریلائنس انڈسٹریز لمیٹڈ (آر آئی ایل) کے چیئرمین مکیش امبانی اور ان کے خاندان کو ممبئی میں مرکزی حکومت کی طرف سے فراہم کردہ سیکورٹی کو جاری رکھنے کی اجازت دی۔
چیف جسٹس این۔ وی رمنا کی سربراہی والی بنچ نے مسٹر امبانی اور ان کے خاندان کو فراہم کی جانے والی Z+ سیکورٹی کو درست قرار دیا۔بنچ نے کہا کہ اسے تریپورہ ہائی کورٹ کے سامنے سیکورٹی کو چیلنج کرنے والی مفاد عامہ کی عرضی کی سماعت جاری رکھنے کی کوئی وجہ نہیں ملتی ہے ۔
سپریم کورٹ نے تریپورہ ہائی کورٹ میں بیکاش شاہ کی طرف سے دائر مفاد عامہ کی عرضی کو غیر ضروری قرار دیتے ہوئے مرکزی حکومت کی اپیل کو قبول کر لیا۔ مرکزی حکومت نے مسلسل سیکورٹی کی درخواست کی تھی۔
سپریم کورٹ نے ہائی کورٹ کے حکم کو چیلنج کرنے والی مرکزی حکومت کی عرضی پر سماعت کرتے ہوئے یہ بھی نوٹ کیا کہ مسٹر امبانی اپنی سیکورٹی کی قیمت حکومت کو ادا کر رہے ہیں۔
جسٹس سوریہ کانت اور جسٹس جے ۔ بی۔ پردی والا کی تعطیلات والی بنچ نے 29 جون کو متعلقہ فریقوں کے دلائل سننے کے بعد، تریپورہ ہائی کورٹ میں سیکورٹی کے سوال پر دائر ایک مفاد عامہ کی عرضی پر جاری سماعت پر عبوری روک لگا دی تھی۔
مرکز نے تریپورہ ہائی کورٹ کے اس حکم کے خلاف عدالت عظمیٰ کا رخ کیا جس میں انہیں (امبانی اور ان کے خاندان) کو درپیش خطرے کی تفصیلات طلب کی گئی ایک مفاد عامہ کی عرضی میں مرکزی حکومت کی سفارش پر مسٹر امبانی اور ان کے خاندان کو فراہم کی جانے والی سیکورٹی پر سوال کیا گیا تھا۔
سالیسٹر جنرل نے عدالت عظمیٰ کے سامنے دلیل دی تھی کہ مسٹر امبانی کو فراہم کردہ سیکورٹی کا تریپورہ حکومت سے کوئی لینا دینا نہیں ہے ۔ لہذا، ہائی کورٹ کے پاس مفاد عامہ کی عرضی پر غور کرنے کا کوئی دائرہ اختیار نہیں ہے ۔
مسٹر مہتا نے ہائی کورٹ کے اس حکم کی صداقت پر بھی سوال اٹھایا جس میں مرکزی وزارت داخلہ کے افسران سے 28 جون کو اپنے عبوری حکم میں ہائی کورٹ کے سامنے دھمکی کے اندیشے سے متعلق دستاویزات کے ساتھ حاضر ہونے کو کہا گیا تھا۔
سالیسٹر جنرل نے عدالت عظمیٰ کے سامنے یہ بھی عرض کیا تھا کہ مرکز نے تریپورہ ہائی کورٹ کو بھی بتایا تھا کہ بمبئی ہائی کورٹ نے امبانی کو سیکورٹی فراہم کرنے سے متعلق اسی طرح کی درخواست کو خارج کر دیا ہے ۔