بی جے پی میں شامل ہوئے آپ کے کونسلر وکاس ٹانک

نئی دہلی، 15 جولائی (یو این آئی) عام آدمی پارٹی کے کارپوریشن کونسلر اور والمیکی سماج کے نوجوان لیڈر وکاس ٹانک بدھ کو بھارتیہ جنتا پارٹی میں شامل ہو گئے۔
دہلی بی جے پی کے صدر اور مرکزی وزیرِ مملکت ہرش ملہوترا نے پارٹی کا پٹکا پہنا کر اور مسڈ کال کے ذریعے سول لائن وارڈ سے تین بار کے کونسلر ٹانک کو پارٹی کی رکنیت دلائی۔ اس موقع پر چاندنی چوک سے رکنِ پارلیمنٹ پروین کھنڈیلوال اور بی جے پی کے ترجمان پروین شنکر کپور موجود تھے۔ اس موقع پر مسٹر ملہوترا نے کہا کہ آج یہ بتاتے ہوئے خوشی ہو رہی ہے کہ بی جے پی کی پالیسیوں سے متاثر ہو کر دہلی میونسپل کارپوریشن کے سٹی ایس پی زون کے صدر وکاس ٹانک بی جے پی میں شامل ہو رہے ہیں۔
انہوں نے کہا کہ دہلی میں بی جے پی کی حکومت اب میونسپل کارپوریشن اور دہلی ریاست دونوں میں ہونے کی وجہ سے مسلسل ترقیاتی کام ہو رہے ہیں۔
انہوں نے کہا کہ دہلی میں جب سے محترمہ ریکھا گپتا کی حکومت آئی ہے تب سے انہوں نے دہلی کی میونسپل کارپوریشن کو مالی طور پر مضبوط کرنا شروع کر دیا ہے۔
انہوں نے کہا کہ کارپوریشن کی طرف سے ہونے والے کام جیسے ڈھلاؤ میں کمپیکٹرز لگائے جا رہے ہیں، پارکوں کی صفائی ہو رہی ہے، گلیوں اور سڑکوں کی صفائی اور ترقیاتی کام کیے جا رہے ہیں۔ انہوں نے کہا کہ جب تک عام آدمی پارٹی کارپوریشن اور حکومت دونوں میں تھی، تب تک دہلی میں ترقیاتی کام رکے ہوئے تھے، لیکن بی جے پی حکومت کے آنے کے بعد مسلسل کام ہو رہے ہیں۔ ترقی کی سیاست اور ترقی میں کوئی سیاست نہ کرنا ہی بی جے پی کا مقصد رہتا ہے اور اسی وجہ سے آج مسلسل بی جے پی ایک تنظیم کے طور پر مضبوط ہوتی جا رہی ہے۔
مسٹر ٹانک نے بی جے پی میں شامل ہونے کے موقع پر کہا کہ عام آدمی پارٹی نے میونسپل کارپوریشن میں آنے سے پہلے کئی وعدے کیے لیکن اقتدار میں آنے کے بعد کوڑے کے پہاڑ کو ختم کرنے کا وعدہ پورا نہیں کیا اور نہ ہی ہاؤس کو چلنے دیا۔ ان کے جتنے بھی کونسلر ہیں ان پر کام نہ کرنے کا دباؤ بنایا جاتا تھا جس کے بعد ایک ایک کر کے کئی کونسلر عام آدمی پارٹی چھوڑ گئے۔ انہوں نے کہا، "آج مجھے اس بات کی خوشی ہو رہی ہے کہ میں ایک ایسی پارٹی کا حصہ بن رہا ہوں جو ترقی کی سیاست کرتی ہے اور سب کا ساتھ، سب کا وکاس اور سب کا وشواس کے ساتھ تمام طبقات کو یکساں طور پر احترام دینے کا کام کرتی ہے۔”