این سی ارکانِ اسمبلی کو رشوت کی پیشکش کے الزام پر سات دن میں غیر مشروط معافی اور بیان واپس لینے کا مطالبہ
ویب ہتکِ عزت کا مقدمہ دائر کرنے کا انتباہ/۱۰۰کروڑ روپے کا قانونی نوٹس، نقصان کی تلافی کیلئےیہ رقم بھی ناکافی:شرماڈیسک
سرینگر/۱۳ جولائی
جموں و کشمیر بی جے پی نے پیر کے روز وزیر اعلیٰ عمر عبداللہ کو قانونی نوٹس جاری کرتے ہوئے ان کے اس الزام پر سخت اعتراض کیا ہے کہ بھارتیہ جنتا پارٹی نے ان کی حکومت گرانے کے لیے نیشنل کانفرنس کے ارکانِ اسمبلی کو نقد رقم اور وزارتوں کی پیشکش کی تھی۔
بی جے پی نے ان الزامات کو ’جھوٹا، بے بنیاد اور ہتک آمیز‘ قرار دیتے ہوئے وزیر اعلیٰ سے سات روز کے اندر تحریری طور پر اپنے بیانات واپس لینے اور غیر مشروط عوامی معافی مانگنے کا مطالبہ کیا ہے۔ پارٹی نے خبردار کیا ہے کہ ایسا نہ کرنے کی صورت میں ان کے خلاف دیوانی اور فوجداری کارروائی کے علاوہ۱۰۰ کروڑ روپے ہرجانے کا ہتکِ عزت کا مقدمہ بھی دائر کیا جائے گا۔
وزیر اعلیٰ عمر عبداللہ نے گزشتہ ہفتے حضرت بل میں نیشنل کانفرنس کارکنوں سے خطاب کرتے ہوئے الزام لگایا تھا کہ بی جے پی ان کی جماعت میں پھوٹ ڈال کر حکومت گرانے کی کوشش کر رہی ہے۔ انہوں نے یہ بھی دعویٰ کیا تھا کہ جموں سے تعلق رکھنے والے نیشنل کانفرنس کے ایک رکن اسمبلی نے انہیں بتایا کہ بی جے پی میں شامل ہونے کے عوض انہیں۲۰ سے۳۰کروڑ روپے اور وزارت کی پیشکش کی گئی تھی۔
یہ قانونی نوٹس بی جے پی جموں و کشمیر کے صدر اور راجیہ سبھا رکن پارلیمان ست پال شرما کی ہدایت پر ایڈوکیٹ پریموکش سیٹھ کے ذریعے جاری کیا گیا ہے۔ نوٹس میں کہا گیا ہے کہ وزیر اعلیٰ کے بیانات سے بی جے پی اور اس کے عہدیداروں کی ساکھ اور عوامی وقار کو شدید نقصان پہنچا ہے۔
بی جے پی کے ایک ترجمان نے بتایا کہ قانونی نوٹس وزیر اعلیٰ کو ارسال کر دیا گیا ہے۔
تین صفحات پر مشتمل نوٹس میں کہا گیا ہے کہ عمر عبداللہ نے الزام عائد کیا تھا کہ بی جے پی کے عہدیداروں نے جموں خطے کے بعض نیشنل کانفرنس ارکانِ اسمبلی سے رابطہ کرکے انہیں۲۰ سے۳۰ کروڑ روپے، وزارتیں اور ریاست کا درجہ بحال کرانے کی پیشکش کی تاکہ وہ بی جے پی میں شامل ہو جائیں۔
نوٹس میں وزیر اعلیٰ کے اس دعوے کا بھی حوالہ دیا گیا ہے کہ سپریم کورٹ میں وکالت کرنے والے بی جے پی کے ایک سینئر عہدیدار نے مبینہ طور پر اس پیشکش میں کردار ادا کیا۔بی جے پی نے ان تمام الزامات کو مسترد کرتے ہوئے انہیں ’مکمل طور پر جھوٹا، بدنیتی پر مبنی اور حقائق سے عاری‘ قرار دیا ہے۔
نوٹس میں کہا گیا ہے کہ یہ الزامات جان بوجھ کر پارٹی کی شبیہ خراب کرنے کے لیے لگائے گئے اور ان کی وسیع پیمانے پر تشہیر کے باعث بی جے پی کی ساکھ کو نمایاں نقصان پہنچا ہے۔
قانونی نوٹس میں کہا گیا ہے کہ یہ الزامات دیوانی اور فوجداری دونوں قوانین کے تحت ہتکِ عزت کے زمرے میں آتے ہیں، لہٰذا وزیر اعلیٰ فوری طور پر تحریری طور پر اپنے الزامات واپس لیں۔
نوٹس میں مطالبہ کیا گیا ہے کہ وزیر اعلیٰ نوٹس موصول ہونے کے سات دن کے اندر غیر مشروط عوامی معافی مانگیں، بی جے پی کے خلاف مزید کوئی ہتک آمیز مواد شائع یا نشر کرنے سے گریز کریں اور آئندہ اس نوعیت کے بیانات دینے یا دہرانے سے باز رہیں۔
بی جے پی نے خبردار کیا ہے کہ مقررہ مدت میں مطالبات پورے نہ ہونے کی صورت میں مجاز عدالت سے رجوع کرتے ہوئے دیوانی اور فوجداری کارروائی شروع کی جائے گی، جس میں ایک سو کروڑ روپے ہرجانے کا دعویٰ بھی شامل ہوگا۔
دریں اثنا، پی ٹی آئی سے گفتگو کرتے ہوئے بی جے پی جموں و کشمیر کے صدر ست پال شرما نے قانونی نوٹس جاری کرنے کے فیصلے کا دفاع کرتے ہوئے کہا کہ وزیر اعلیٰ کے سنگین الزامات کا مقصد بی جے پی اور وزیر اعظم نریندر مودی کی شبیہ کو نقصان پہنچانا تھا۔
انہوں نے کہا’’یہ لوگ بار بار بی جے پی اور وزیر اعظم کی ساکھ کو مجروح کرنے کی کوشش کرتے ہیں۔ ان کی پوری توجہ ایک ایسے رہنما کی شبیہ خراب کرنے پر رہی ہے جسے پوری دنیا میں عزت کی نگاہ سے دیکھا جاتا ہے۔ اسی لیے ہمارے قانونی شعبے نے انہیں نوٹس جاری کیا ہے۔ ان کے عہدے اور حیثیت کو مدنظر رکھتے ہوئے بی جے پی نے ان سے۱۰۰ کروڑ روپے ہرجانے کا مطالبہ کرنے کا فیصلہ کیا ہے۔ انہوں نے جو نقصان پہنچایا ہے، اس کے مقابلے میں یہ رقم بھی ناکافی ہے۔ اپنے بیانات کے ذریعے انہوں نے دنیا کی سب سے بڑی سیاسی جماعت، جو گزشتہ بارہ برس سے اقتدار میں ہے اور ملک کے مفاد میں کام کر رہی ہے، کی ساکھ کو نقصان پہنچانے کی کوشش کی ہے‘‘۔
شرما نے کہا کہ جموں و کشمیر میں بھی، خصوصاً گزشتہ دو برسوں کے دوران، نمایاں ترقی ہوئی ہے۔ ’’خود عمر عبداللہ وزیر اعظم کے ساتھ مختلف افتتاحی تقریبات میں شریک رہے ہیں، لیکن اس کے باوجود انہوں نے وزیر اعظم کی جماعت کی شبیہ خراب کرنے کی کوشش کی‘‘۔
ریاستی درجے کی بحالی کے مطالبے کے حق میں۲۰ جولائی کو دہلی میں نیشنل کانفرنس کی مجوزہ احتجاجی ریلی میں شرکت کی دعوت کو مسترد کرتے ہوئے شرما نے کہا کہ بی جے پی کو وزیر اعظم نریندر مودی کی اس یقین دہانی پر مکمل اعتماد ہے کہ مناسب وقت پر جموں و کشمیر کو ریاست کا درجہ بحال کر دیا جائے گا۔انہوں نے کہا’’ہمیں وزیر اعظم کی یقین دہانی پر مکمل بھروسہ ہے۔ اگر کسی رہنما یا وزیر اعلیٰ کو ان کی بات پر اعتماد نہیں تو ہم انہیں کیسے روک سکتے ہیں؟ وہ جانے کے لیے آزاد ہیں، ہم نے کبھی نہیں کہا کہ وہ نہ جائیں‘‘۔
نیشنل کانفرنس پر ریاستی درجے کی بحالی میں تاخیر کا ماحول پیدا کرنے کا الزام عائد کرتے ہوئے شرما نے کہا، ’’ایک طرف یہ لوگ علیحدگی پسندوں کو بھی اپنے ساتھ آنے کی دعوت دیتے ہیں۔ اگر جموں و کشمیر میں علیحدگی پسندی پروان چڑھی تو اس کے ذمہ دار یہی لوگ ہیں۔ یہی وجہ ہے کہ ریاست کا درجہ بحال ہونے میں تاخیر ہوئی ہے‘‘۔
وزیر اعظم کے ’مناسب وقت‘ کے بیان کی وضاحت کرتے ہوئے انہوں نے کہا کہ جموں و کشمیر میں امن، استحکام اور سازگار ماحول کو مزید مضبوط بنانا ضروری ہے۔’’ہم سب کو مل کر ایسا ماحول پیدا کرنا چاہیے تاکہ ریاست کا درجہ بحال کیا جا سکے۔‘‘
