نئی دہلی، 11 جولائی (یواین آئی) مرکزی تفتیشی بیورو (سی بی آئی) نے 133.52 کروڑ روپے کے بینک فراڈ کے ایک معاملے میں ایک نجی کمپنی کے ڈائریکٹروں سے متعلق ممبئی (مہاراشٹر) اور کوچی (کیرالہ) کے متعدد مقامات پر جمعہ کے روز چھاپے مارے۔
یہ مقدمہ اسٹیٹ بینک آف انڈیا (ایس بی آئی) کی ممبئی واقع ایس اے ایم برانچ کی شکایت پر 9 جولائی کو درج کیا گیا تھا۔ مقدمہ نجی کمپنی کے ڈائریکٹروں، نامعلوم سرکاری ملازمین اور دیگر نجی افراد کے خلاف بینک کو تقریباً 133.52 کروڑ روپے کا نقصان پہنچانے کے الزام میں درج کیا گیا ہے۔
سی بی آئی کے مطابق، فرنس فیبریکا (انڈیا) لمیٹڈ کے ڈائریکٹر اے آر بشیرالدین، بدری پرساد، نجی بشیرالدین، رئیس بشیرالدین اور صنم بشیر نے مبینہ طور پر مجرمانہ سازش کے تحت غلط مالی معلومات پیش کرکے ایس بی آئی سے بھاری قرض حاصل کیا۔
تحقیقی ایجنسی کا الزام ہے کہ ملزمان نے قرض کی رقم کو اس مقصد کے بجائے، جس کے لیے قرض منظور کیا گیا تھا، دوسری جگہ منتقل کیا اور اس کا غلط استعمال کیا، جس کے نتیجے میں بینک کو بھاری مالی نقصان اٹھانا پڑا۔
سی بی آئی نے بتایا کہ چھاپوں کے دوران اس مبینہ فراڈ کی تحقیقات سے متعلق کئی اہم دستاویزات اور دیگر قابلِ اعتراض مواد برآمد کیا گیا ہے۔
