فیفا ریفریز چیف کا ناقدین کو جواب، ریفریز کی دیانت داری پر سوال قبول نہیں: کولینا

اٹلانٹا، 9 جولائی (یو این آئی): فیفا کے ریفریز چیف پیئرلوئیجی کولینا نے مصر کے خلاف ارجنٹینا کی متنازع 3-2 فتح میں ریفریز کے فیصلوں کا دفاع کرتے ہوئے کہا ہے کہ میچ آفیشلز نے مکمل آزادی کے ساتھ کام کیا اور ان کی دیانت داری پر کوئی سوال نہیں اٹھایا جا سکتا۔
کولینا نے کہا کہ ریفریز پر جانبداری کے بے بنیاد الزامات نہ صرف ناقابل قبول ہیں بلکہ اس سے ریفریز اور ان کے اہل خانہ کو دھمکیوں کا سامنا بھی کرنا پڑ سکتا ہے۔ انہوں نے واضح کیا کہ وی اے آر نے مصطفیٰ زیکو کا گول لیساندرو مارٹینیز کے خلاف فاؤل کی وجہ سے درست طور پر منسوخ کیا، جبکہ ارجنٹینا کے فاتحانہ گول سے قبل مصر کو پنالٹی نہ دینے کا فیصلہ بھی درست تھا۔
انہوں نے کہا کہ فیصلوں پر تعمیری بحث فٹبال کا حصہ ہے، لیکن کوئی یہ دعویٰ نہیں کر سکتا کہ فیفا کے ریفریز پر کسی کا اثر ہوتا ہے، حتیٰ کہ فیفا کے صدر جیانی انفانٹینو بھی ریفری کے فیصلوں پر اثرانداز نہیں ہو سکتے۔
مصر فٹبال ایسوسی ایشن نے میچ کے بعد فیصلوں پر شدید اعتراض کرتے ہوئے کہا تھا کہ کئی اہم فیصلوں نے میچ کا رخ بدل دیا اور ان کی شفافیت پر سنجیدہ سوالات کھڑے کیے۔