ایجنسیاں
جموں؍۹ جولائی
جموں و کشمیر کے محکمۂ اسکولی تعلیم نے نئی ہدایات جاری کرتے ہوئے واضح کیا ہے کہ ایک سے زائد پوسٹ گریجویٹ (پی جی) ڈگری رکھنے والے اساتذہ کو اپنی سنیارٹی اور ترقی کے تعین کے لیے صرف ایک ہی مضمون کا انتخاب کرنے کی اجازت ہوگی۔
محکمہ کی جانب سے جاری کردہ ایک سرکولر کے مطابق، اہل اساتذہ کو۳۰ دن کے اندر ایک مرتبہ یہ اختیار استعمال کرتے ہوئے تحریری طور پر اس پوسٹ گریجویٹ مضمون کی نشاندہی کرنی ہوگی جسے وہ اپنی ملازمت سے متعلق فوائد کے لیے بنیاد بنانا چاہتے ہیں۔
سرکولر میں کہا گیا ہے کہ اساتذہ کی جانب سے منتخب کیا گیا مضمون حتمی تصور کیا جائے گا اور مستقبل میں سنیارٹی اور ترقی سے متعلق تمام معاملات میں اسی کا اطلاق ہوگا۔ محکمہ کے مطابق اس فیصلے کا مقصد یکسانیت، شفافیت اور کیڈر کے مؤثر انتظام کو یقینی بنانا ہے۔
محکمہ نے جموں اور کشمیر کے ڈائریکٹروں برائے اسکولی تعلیم کو ہدایت دی ہے کہ وہ ایسے تمام معاملات کی نشاندہی کریں، متعلقہ اساتذہ سے مقررہ فارم کے مطابق ان کا انتخاب حاصل کریں اور اسی کے مطابق سنیارٹی کے ریکارڈ کو اپ ڈیٹ کریں۔
سرکولر کے مطابق، ایک مرتبہ انتخاب کو حتمی شکل دیے جانے کے بعد کسی استاد کی دیگر پوسٹ گریجویٹ ڈگریوں کو سنیارٹی یا ترقی کے لیے زیرِ غور نہیں لایا جائے گا۔
اگر کوئی استاد مقررہ مدت کے اندر اپنا انتخاب جمع نہیں کراتا تو محکمہ سروس رولز کے مطابق متعلقہ مضمون کا تعین خود کرے گا، اور بعد ازاں مضمون کی تبدیلی کی کوئی درخواست قبول نہیں کی جائے گی۔
محکمۂ اسکولی تعلیم نے تمام متعلقہ حکام کو نئی ہدایات پر سختی سے عمل درآمد یقینی بنانے کی ہدایت بھی جاری کی ہے۔
