حکومت نے پیاز کی قیمت خرید 250 روپے بڑھا کر 2,125 روپے فی کوئنٹل کی

نئی دہلی، 4 جولائی (یو این آئی) مرکز نے قیمتوں میں استحکام کی اسکیم کے تحت پیاز کی سرکاری قیمت خرید میں 13 فیصد (250 روپے) کا اضافہ کر کے اسے 2,125 روپے فی کوئنٹل کر دیا ہے جو ہفتہ سے ہی نافذ العمل ہو گیا ہے۔
حکومت نے یہ بھی واضح کیا ہے کہ ملک میں پیاز کی کوئی کمی نہیں ہے اور سپلائی معمول کے مطابق ہے لیکن بارش میں تاخیر کی وجہ سے مہاراشٹر اور کرناٹک کے کچھ علاقوں میں پیاز کی بوائی سست چل رہی ہے۔ اس سے خاص طور پر پیاز کی بڑے پیمانے پر کاشت کرنے والی ریاستوں جیسے مہاراشٹر، مدھیہ پردیش اور گجرات کے کسانوں کو بہتر منافع ملے گا اور قیمتوں میں استحکام کے بفر اسٹاک کے لیے خریداری بڑھے گی۔ حکومت پیاز جیسی کچھ فصلوں کی قیمتوں میں تیز اتار چڑھاؤ کے دور میں کسانوں اور صارفین کے مفادات کے تحفظ کے لیے قیمتوں میں استحکام کی اسکیم کے تحت بفر اسٹاک رکھتی ہے۔ حکومت یہ خریداری نیفیڈ (نیشنل ایگریکلچرل کوآپریٹو مارکیٹنگ فیڈریشن) اور این سی سی ایف (نیشنل کوآپریٹو کنزیومرز فیڈریشن آف انڈیا لمیٹڈ) کے ذریعے کراتی ہے۔
وزارت برائے امور صارفین، خوراک اور عوامی نظام تقسیم کی جانب سے ہفتہ کو جاری کردہ ایک ریلیز کے مطابق پیاز کی قیمت خرید 13 فیصد بڑھا کر 1,875 روپے فی کوئنٹل سے 2,125 روپے فی کوئنٹل کر دی گئی ہے۔ ترمیم شدہ قیمت خرید 4 جولائی سے نافذ ہو گئی ہے۔ وزارت نے کہا ہے کہ اس فیصلے سے پیاز پیدا کرنے والے کسانوں کو بہتر منافع ملے گا اور ساتھ ہی بفر خریداری کی کوششوں کو بھی مدد ملے گی۔ محکمہ زراعت اور کسانوں کی فلاح و بہبود کے سال 26-2025 کے دوسرے پیشگی تخمینے کے مطابق، پیاز کی پیداوار 307.37 لاکھ ٹن (ایل ایم ٹی) ہونے کا اندازہ ہے، جو سال 25-2024 کی 307.67 لاکھ ٹن پیداوار کے تقریباً برابر ہے۔ پیداوار کے تخمینے کو دیکھتے ہوئے، فی الحال پیاز کی کل دستیابی تشویش کا باعث نہیں ہے، تاہم قیمتوں میں معمول کے موسمی اتار چڑھاؤ کے مطابق معمولی اضافے کی توقع کی جا سکتی ہے۔
ریلیز میں کہا گیا ہے کہ مہاراشٹر، مدھیہ پردیش اور گجرات میں پیاز کا ذخیرہ کافی ہے۔ فی الحال، ذخیرہ شدہ پیاز کی کمی کے کوئی آثار نہیں ہیں۔ آل انڈیا سطح پر منڈیوں میں پیاز کی روزانہ آمد 50,000 ٹن سے زیادہ بنی ہوئی ہے، مہاراشٹر میں یہ آمد 30,000 ٹن سے زیادہ ہے، اور اوسط خردہ قیمت تقریباً 18 روپے فی کلوگرام ہے۔ بہتر کوالٹی کا اسٹاک ذخائر میں موجود ہے اور مندی کے دور میں اس کے جاری ہونے کی امید ہے۔ آل انڈیا اوسط خردہ قیمت 31 روپے فی کلوگرام ہے۔ مانسون کی آمد میں تاخیر اور کچھ علاقوں میں معمول سے کم بارش کی وجہ سے تاجروں کے ایک طبقے کی جانب سے سٹے بازی کی بنیاد پر خریداری کی جا رہی ہے، تاہم بڑی صارف منڈیوں میں موجودہ قیمتوں پر کوئی خاص مانگ نہیں ہے۔ صارف منڈیوں میں مثبت ماحول کے باوجود، ناسک اور مدھیہ پردیش کے کچھ حصوں جیسے پیداواری مراکز میں سٹے بازی کی سرگرمیاں دیکھی جا رہی ہیں، جو مضبوط حقیقی مانگ کے بجائے مستقبل میں مارکیٹ میں بہتری کی امیدوں پر مبنی ہیں۔ وزارت نے بتایا ہے کہ پیاز کی برآمد معمول کے مطابق ہے، جون 2026 کے دوران تقریباً 1.50 لاکھ ٹن پیاز برآمد کی گئی۔ تاہم، تاجروں کو امید ہے کہ پیاز کی برآمد کی رفتار کچھ وقت کے لیے دھیمی ہو سکتی ہے، بنیادی طور پر اس لیے کیونکہ پاکستان اور چین سے تازہ فصلیں خلیجی ممالک، سری لنکا اور مشرق بعید جیسے بڑے برآمدی مقامات پر مسابقتی نرخوں پر دستیاب ہیں۔
جہاں مہاراشٹر کے ناسک خطے میں خریف کی بوائی میں تقریباً 15 دن کی تاخیر درج کی گئی ہے،یں کرناٹک کے چتردرگ اور چلاکیرے علاقوں میں بوائی کی پیشرفت معمول کی سطح سے تقریباً 60 فیصد ہونے کا اندازہ ہے۔